“Rama jepe dorëheqjen”, sot mbahet protesta e 25-të e qytetarëve

Protesta e 25-të radhazi pritet të mbahet sot në Tiranë, ku qytetarët do të dalin sërish në rrugë për të kërkuar dorëheqjen e menjëhershme dhe të panegociueshme të kryeministrit Edi Rama, si dhe largimin e qeverisë aktuale.

Kjo protestë konsiderohet si kulmi i një mobilizimi të gjerë qytetar, pas më shumë se tre javësh demonstrata të pandërprera në kryeqytet. Ajo që nisi si një reagim ndaj një ngjarjeje konkrete, tashmë është shndërruar në një lëvizje më të gjerë kundër korrupsionit, keqqeverisjes, mungesës së transparencës dhe fenomenit të largimit masiv të të rinjve nga Shqipëria.

Mbrëmjen e kaluar u zhvillua protesta e 24-të, gjatë së cilës mijëra qytetarë marshuan në disa akse kryesore të Tiranës. Tubimi kulmoi përpara godinës së Kryeministrisë, ku u mbajtën fjalime dhe u përsërit kërkesa kryesore e protestuesve: dorëheqja e kryeministrit.

Pjesëmarrësit mbajtën pankarta dhe artikuluan thirrje të forta kundër qeverisë, ndërsa marshimi përshkoi disa zona të kryeqytetit përpara se të rikthehej në sheshin “Skënderbej”, ku u mbyll edhe protesta.

Organizatorët kanë paralajmëruar se protestat do të vijojnë deri në arritjen e qëllimit të tyre, duke e cilësuar këtë lëvizje si një moment kyç për reagimin qytetar dhe kërkesën për ndryshim politik në vend.