Rama reagon: Pse Shqipëria të mos ketë Costa Navarinon e saj?
gazetari Basri Çollaku ka çmontuar tonet e propagandës: “Rrenat e sabahut” të Ramës me Costa Navarino-n dhe e vërteta e Zvërnecit
Kryeministri i Shqipërisë, Edi Rama, sërish ka reaguar për çështjen e Zvërnecit.
Mëngjesin e sotëm ai ka sjellë në vëmendje shembullin e projektit turistik Costa Navarino në Greqi, duke e cilësuar atë si dëshmi se projektet e mëdha zhvillimore mund të transformojnë një territor pa dëmtuar ekuilibrin mes natyrës dhe komunitetit.
Në profilin e tij në Facebook, ai ka shkruar se edhe Costa Navarino ishte kundërshtuar fillimisht, por sot është një nga destinacionet turistike më prestigjioze të Evropës.
“Mirëmëngjesi dhe me këtë histori të vërtetë nga fqinjët tanë të jugut, ju uroj ditë të mbarë. Costa Navarino mund të quhet ndryshe historia e zakonshme e lajmëtarëve të katastrofës, atyre që nuk ëndërrojnë po paragjykojnë ëndrrat e të tjerëve; nuk projektojnë po gjykojnë projektet e të tjerëve; nuk ndërtojnë po përgojojnë ata që ndërtojnë. Sa më e madhe ëndrra aq më i madh paragjykimi i tyre, sa më ambicioz projekti, aq më e madhe katastrofa e paralajmëruar, sa më i madh ndërtimi aq më i llahtarshëm përgojimi i atyre që ndërtojnë. Ndodhi në Greqi. Me Costa Navarinon. Para se të ndërtohej, u tha se po vinte fundi i botës. U tha se do të shkatërrohej natyra. U tha se do të zhdukej biodiversiteti. U tha se fushat e golfit do të pinin ujin e brezave që do të vinin dhe Messinia do të kthehej në shkretëtirë”, ka shkruar ai.
Por gazetari Basri Çollaku ka çmontuar tonet e propagandës: “Rrenat e sabahut” të Ramës me Costa Navarino-n dhe e vërteta e Zvërnecit
Gazetari i njohur investigativ, Basir Çollaku, ka reaguar ashpër pas postimit të hershëm të kryeministrit Edi Rama, i cili u zgjua mëngjesin e sotëm duke promovuar projektin e shumëdebatuar të Zvërnecit përmes një paralelizmi me resortin e famshëm grek, Costa Navarino.
Përmes një analize pikë për pikë, Çollaku ka “çmontuar” atë që ai e cilëson si propaganda dhe mashtrimi i radhës i “Bablokut”, duke nxjerrë në dritë ndryshimet drastike mes modelit europian të investimit në Greqi dhe asaj që po përgatitet të ndodhë në bregdetin shqiptar.
Sipas Çollakut, kryeministri nuk ka kursyer gënjeshtrat e qëllimshme për të justifikuar projektin e tij, duke renditur 8 fakte kokëfortë që rrëzojnë narrativën qeveritare:
1. Zero konflikte me komunitetin dhe ambientalistët
Përkundër pretendimeve të Ramës për pengesa, investitori grek Vasilis Konstantakopulos (bir i asaj zone) nuk ka pasur asnjëherë mosmarrëveshje, konflikt publik apo gjyqësor me komunitetin lokal, kombëtar apo me organizatat ambientaliste.
2. 20 vite negociata dhe blerje me çmim tregu
Ndryshe nga formula e “shpronësimeve strategjike” apo dhurimit të tokave publike në Shqipëri, familja Konstantakopulos ka negociuar me durim për 20 vjet me radhë me fshatarët e zonës, duke ua blerë parcelat e tokës me çmimin real të tregut.
3. Vetëm 10% ndërtim në 1000 hektarë
Nëse në Shqipëri projektet synojnë betonizim masiv, Costa Navarino shtrihet në 1 mijë hektarë terren, nga të cilat vetëm 10% e sipërfaqes është zënë me ndërtime (gjithsej 4 hotele në të gjithë hapësirën).
4. Status ligjor i qartë (POTA)
Shteti grek nuk ka vepruar me VKM të mbyllura apo ligje speciale të personalizuara, por i ka dhënë zonës statusin e rregullt ligjor POTA (Zonë e Zhvillimit Turistik të Integruar).
5. Ruajtja e ujërave nëntokësore
Resorti grek disponon megarezervuarë të shumtë që mbushen me ujë nga lumenjtë gjatë stinës së dimrit, pikërisht për të mbrojtur dhe për të mos shfrytëzuar apo keqpërdorur napat freatike (ujërat nëntokësore) të zonës.
6. Kujdesi ekstrem për mjedisin: Zhvendosja e ullinjve
I vetmi debat mjedisor që ka ekzistuar në Greqi ka qenë për 6 mijë pemë ulliri mijëravjeçare. Ato nuk u prenë e as u shkatërruan: u zhvendosën me kujdes të lartë gjatë fazës së kantierit dhe u rivendosën të gjitha në vendin e tyre pas përfundimit të punimeve.
7. Arkitekturë e ulët (Low Rise)
Për të ruajtur peizazhin natyror dhe për t’u integruar në mënyrë të përsosur me linjën e horizontit, hotelet në Costa Navarino janë projektuar vetëm me 2 deri në 3 kate, larg kullave dhe strukturave shumëkatëshe.
8. Plazh publik dhe pa pagesë për të gjithë
Dhe pika më jetike që ndan modelin grek nga ai që po aplikohet në Shqipëri: hyrja e qytetarëve në bregdetin e Costa Navarino-s është krejtësisht e lirë, pa asnjë kufizim dhe pa asnjë pagesë. Plazhi mbetet i hapur për publikun e thjeshtë.
“Huqi del me shpirtin,” përfundon gazetari Çollaku, duke ironizuar përpjekjen e kreut të qeverisë për të shitur një projekt të dyshimtë e me hije betonizimi në Zvërnec, duke e krahasuar atë me një histori suksesi dhe respekti ndaj pronës e mjedisit si ajo e Greqisë fqinje.
Keni një histori? Denonco anonimisht, identiteti juaj mbrohet.
Denonco
