Raporti i Parlamentit Evropian: Korrupsioni, problem serioz!

Raporti përfundimtar i Parlamentit Evropian për Shqipërinë për vitin 2026 ngre shqetësime të forta mbi sundimin e ligjit, pavarësinë e gjyqësorit dhe situatën e lirisë së medias, duke evidentuar gjithashtu problematika të vazhdueshme në luftën kundër korrupsionit.

Dokumenti thekson nevojën për rezultate konkrete në hetimin dhe ndëshkimin e rasteve të korrupsionit, veçanërisht në nivele të larta, ku sipas tij mungon ende një bilanc i qëndrueshëm dënimesh përfundimtare. Raporti nënvizon se përparimet ligjore nuk janë shoqëruar me rezultate të prekshme në praktikë.

Një nga treguesit më domethënës është rënia e Shqipërisë në Indeksin e Perceptimit të Korrupsionit të Transparency International, nga vendi i 80-të në vitin 2024 në vendin e 91-të në vitin 2025, çka reflekton përkeqësim të perceptimit për nivelin e korrupsionit në vend.

Korrupsioni vijon të cilësohet si një shqetësim serioz, ndërsa kërkohet forcim i kapaciteteve të institucioneve ligjzbatuese dhe rritje e efikasitetit në hetime dhe ndjekje penale.

Në raport i kushtohet rëndësi edhe funksionimit të Prokurorisë së Posaçme (SPAK), për të cilën kërkohet garantimi i pavarësisë, burimeve të mjaftueshme dhe mbështetjes së plotë në ushtrimin e kompetencave hetimore, pa ndërhyrje apo kufizime.

Në këtë kontekst, dokumenti vë theks edhe te klima politike dhe vendimmarrjet institucionale që lidhen me zyrtarë të lartë. Kujtohet rasti kur shumica parlamentare e Partisë Socialiste rrëzoi kërkesën për heqjen e imunitetit të ish-zëvendëskryeministres Belinda Balluku, të paraqitur nga Prokuroria e Posaçme, duke penguar vijimin e procedurave për arrestimin e saj.

Gjithashtu, raporti kërkon intensifikimin e përpjekjeve për identifikimin, sekuestrimin dhe konfiskimin e pasurive me origjinë kriminale, duke e konsideruar këtë si një element kyç në luftën kundër korrupsionit dhe krimit të organizuar.