RENEA aksion në Fushë Krujë, Ylli Zalla i shpëton sërish arrestimit

Një tjetër operacion policor është zhvilluar në zonën e Zallës në Fushë Krujë, ku forcat e Policisë së Tiranës, të mbështetura nga njësia elitare RENEA, kanë ndërmarrë aksion për kapjen e një personi të shpallur në kërkim.

Objektiv i operacionit ishte Ylli Zalla, i cili prej muajsh kërkohet nga autoritetet për posedim të një arsenali armësh. Pavarësisht informacioneve të siguruara mbi vendndodhjen e tij, i dyshuari nuk është gjetur në banesë, duke i shpëtuar edhe kësaj here arrestimit.

Gjatë kontrollit të ushtruar në ambientet e banesës, shërbimet e policisë kanë sekuestruar një armë zjarri tip pistoletë, e cila dyshohet se i përket Zallës.

Ndërkohë, në kuadër të këtij operacioni, në kërkim ka qenë edhe vëllai i tij, i shpallur nga Policia e Lezhës. Megjithatë, sipas burimeve, ai është lënë i lirë më vonë.

Autoritetet vijojnë punën për lokalizimin dhe kapjen e Ylli Zallës, ndërsa hetimet për këtë çështje mbeten në zhvillim.