Reshje dëbore edhe në juglindje: Pogradeci dhe zonat malore zbardhen këtë të dielë

Reshjet e dëborës kanë mbuluar juglindjen e vendit këtë të dielë, duke sjellë një pamje të bardhë në qytete dhe zona malore. Pogradeci është zbardhur nga reshjet e para të dëborës për këtë sezon, ndërsa në zonat malore trashësia e dëborës ka arritur nga 5 deri në 10 cm.

Në orët e para të mëngjesit janë raportuar vështirësi në qarkullim në disa fshatra të zonave malore, por akset kryesore që lidhin zonat urbane me njësitë administrative janë të kalueshme pa probleme.

Gjendja e rrugëve:

•Rrugët nacionale, përfshirë segmentet Qafë Thanë – Kapshticë – Zemblak – Gorice – Korçë – Leskovik, janë plotësisht të kalueshme.

•Edhe rrugët që të çojnë në fshatrat turistikë të Dardhës dhe Voskopojës janë të hapura, megjithatë autoritetet këshillojnë drejtuesit e mjeteve të pajisin automjetet me goma dimërore për të shmangur rreziqet.

Energjia elektrike dhe temperaturat:

Nuk raportohen ndërprerje të energjisë elektrike, përveç disa ndërprerjeve të herëpashershme në zonat më të thella malore. Temperaturat në rajonin e juglindjes kanë zbritur në -4 gradë Celsius, duke krijuar kushte tipike dimërore.

Autoritetet janë në gatishmëri për çdo situatë emergjente, ndërsa reshjet pritet të vazhdojnë edhe gjatë orëve në vijim. Drejtuesit e automjeteve këshillohen të tregohen të kujdesshëm, veçanërisht në zonat ku formohen ngrica.