“Në ekran shumë e mirë, por në prapaskenë egoiste”

Roza Lati ka folur hapur për marrëdhëniet në televizionin shqiptar dhe arsyet që e kanë bërë të refuzojë projekte të ndryshme. E ftuar në emisionin “Me Nder Jush” në Andale Media, moderatorja zbuloi se një prej ofertave që nuk pranoi ishte pjesëmarrja në reality show-n “Ferma VIP”, ku ishte ftuar së bashku me të ëmën, aktoren Rita Lati.

Sipas Rozës, arsyeja e refuzimit lidhej me moderatoren e spektaklit, Arbana Osmani. Ajo tregoi se vendimi u mor pasi mësoi se Osmani do të ishte prezantuesja e formatit.

“Unë dhe mamin na kërkuan te Ferma dhe refuzuam kur mora vesh që ishte Arbana që prezantonte”, deklaroi Lati gjatë intervistës.

Roza Lati për Arbanën: Në ekran është shumë e mirë

Gjatë bisedës, Roza ndau edhe përshtypjen e saj për Arbanën, duke bërë dallimin mes paraqitjes së moderatores para kamerave dhe sjelljes së saj jashtë ekranit.

“Arbana para ekranit është shumë e mirë, por në prapaskenë është pak egoiste në drejtimin e ekranit, ka pak ego”, u shpreh ajo.

Deklarata e Latit përfaqëson këndvështrimin e saj personal për moderatoren, ndërsa në intervistë ajo la të kuptohej se as oferta financiare, ndonëse e konsiderueshme, nuk kishte qenë e mjaftueshme për ta ndryshuar vendimin.

“Profesionistët e vjetër nuk po marrin atë që meritojnë”

Përveç kësaj çështjeje, Roza foli edhe për situatën në televizionin shqiptar dhe mundësitë që u jepen figurave me përvojë.

“Profesionistët e vjetër nuk po marrin atë që meritojnë”, u shpreh moderatorja, duke ngritur shqetësimin për mungesën e disa emrave të njohur në ekran.

Ajo shpjegoi gjithashtu se mungesa e saj në televizion lidhet me kushtet e bashkëpunimit që i janë ofruar. Sipas saj, përvoja ndër vite e ka bërë më selektive në zgjedhjen e projekteve dhe nuk dëshiron të pranojë çdo ofertë vetëm për të qenë e pranishme në ekran.

Deri në momentin e publikimit, Arbana Osmani nuk kishte reaguar publikisht ndaj deklaratave të Rozës.