Sulmet e shumta ajrore në rajonin kufitar rus të Belgorodit ngjitur me Ukrainën të shtunën vranë dy persona dhe plagosën të paktën shtatë, tha guvernatori.
Më në lindje, një sulm me dron gjatë natës në rajonin e Samara shkaktoi zjarr në një rafineri të madhe nafte, e fundit në një seri sulmesh kundër industrisë ruse të karburantit.
Guvernatori i Belgorodit Vyacheslav Gladkov shkroi në Telegram se dy distrikte në rajonin e tij, si dhe kryeqyteti rajonal, i quajtur gjithashtu Belgorod, ishin goditur nga sulmet me dron dhe ajror.
“Mëngjes i vështirë,” tha Gladkov.
“Si rezultat i një sulmi ajror nga forcat e armatosura ukrainase në Belgorod, tre ballkone u shembën në një ndërtesë apartamentesh. Një nga këto apartamente ishte zënë nga një çift i martuar. Për më shumë pikëllim, burri vdiq nga plagët e marra në vend,” ai tha.
Ai ka postuar një foto të një ndërtese banimi me fasadë të shkatërruar pjesërisht.
Një person tjetër u vra në një sulm me dron në rrethe jashtë qytetit, tha ai.
Në rajonin e Samara – 1000 kilometra larg nga vijat e frontit në lindje – guvernatori vendor raportoi për “disa sulme me dronë” në rafineritë lokale të naftës.
Një prej tyre shkaktoi një zjarr në rafinerinë Kuibyshev, tha guvernatori Dmitry Azarov në një deklaratë në Telegram, duke theksuar se nuk kishte viktima.
Rafineria, e drejtuar nga gjigandi rus i naftës Rosneft, është një nga më të mëdhatë në rajon, me një kapacitet prodhimi prej shtatë milionë tonësh në vit, sipas faqes së saj zyrtare të internetit.
Një sulm me dron në një rafineri tjetër në rajon, Novokuibyshevsk, “u zmbraps pa dëmtuar pajisjet teknologjike”, tha Azarov.
Sulmet erdhën 24 orë pasi Rusia lëshoi një nga breshëritë e saj më të mëdha ajrore gjatë konfliktit dyvjeçar, duke goditur dhjetëra objekte energjetike të Ukrainës dhe duke lënë përkohësisht më shumë se një milion pa energji elektrike.
Forcat ajrore të Ukrainës thanë se kishin rrëzuar 31 nga 34 dronë rusë që gjuanin në territorin e saj gjatë natës, ndërsa Ministria ruse e Mbrojtjes tha se kishte kapur 12 dronë ukrainas.
Ukraina, e cila është përballur me një ofensivë ruse për më shumë se dy vjet, i ka shtuar sulmet e saj brenda Rusisë javët e fundit, duke synuar në veçanti vendet energjetike.
Dhe Rusia ka nisur gjithashtu një breshëri sulmesh “hakmarrëse”, duke synuar sektorin energjetik të Ukrainës dhe kryeqytetin Kiev në ditët e fundit.
