Sa do kushtojë? Shatërvani i Trevit bëhet zyrtarisht me pagesë

Vizita në Shatërvanin e famshëm të Trevit në Romë nuk do të jetë më falas për të gjithë. Kryetari i Bashkisë së Romës, Roberto Gualtieri, ka konfirmuar se duke nisur nga 1 shkurti, turistët dhe vizitorët e huaj do të duhet të paguajnë një biletë prej 2 eurosh për të pasur akses të drejtpërdrejtë në monument.

Sipas vendimit, vetëm banorët e kryeqytetit italian do të vazhdojnë të kenë hyrje falas. Ndërkohë, shikimi i shatërvanit nga distanca do të mbetet i lirë për të gjithë, por hyrja pranë monumentit do të lejohet vetëm për mbajtësit e biletës, bëri të ditur Gualtieri gjatë një konference për shtyp.

“Nga 1 shkurti po prezantojmë një sistem biletimi për gjashtë monumente në Romë, përfshirë Shatërvanin e Trevit”, deklaroi kryebashkiaku, duke shtuar se hyrja në pesë vendet e tjera do të kushtojë 5 euro.

Shatërvani i Trevit është një nga pikat më të vizituara të Qytetit të Përjetshëm dhe një ndalesë e domosdoshme për miliona turistë. Tradita e hedhjes së monedhës për të bërë një dëshirë është aq e përhapur, sa autoritetet mbledhin mijëra euro çdo javë, të cilat më pas dhurohen për organizatën bamirëse Caritas.

Sipas të dhënave zyrtare, nga 1 janari deri më 8 dhjetor, rreth 9 milionë turistë kanë vizituar zonën përpara shatërvanit, mesatarisht rreth 30 mijë persona në ditë. Mbipopullimi dhe problemet me hajdutët e xhepave kanë qenë ndër arsyet kryesore që kanë shtyrë autoritetet drejt këtij vendimi.

Bashkia e Romës vlerëson se tarifa e hyrjes në Shatërvanin e Trevit mund të gjenerojë rreth 6.5 milionë euro në vit.

Ky nuk është rasti i parë kur Italia vendos tarifa për monumentet historike. Në vitin 2023 u vendos një biletë për hyrjen në Panteon, ndërsa Venecia aplikoi vitin e kaluar një tarifë hyrjeje turistike gjatë periudhave me fluks të lartë vizitorësh.