Sekuestrimi i vilës në Dhërmi, Igli Tare ankimon vendimin

Ish-futbollisti i Kombëtares shqiptare, Igli Tare, ka ndërmarrë hapa ligjorë duke iu drejtuar Gjykatës së Apelit të Posaçëm, ku ka ankimuar vendimin për sekuestrimin e një vile në fshatin Gjilekë të Dhërmiut.

Prona në fjalë u sekuestrua nga Prokuroria e Posaçme (SPAK), pas dyshimeve të ngritura gjatë hetimeve se ajo mund të jetë pasuri e fshehur e ish-zëvendëskryeministres Belinda Balluku.

Sipas hetimeve paraprake, dyshohet se vila është përfituar në formë ryshfeti nga kompania “Eurocol”, e cila pretendohet se është favorizuar në një procedurë tenderuese në kohën kur Balluku mbante detyrën e drejtoreshës së Albcontrol.

Nga ana e tij, Igli Tare kundërshton këto pretendime, duke deklaruar se prona është në pronësinë e tij dhe se masa e sekuestros është e pabazuar dhe e padrejtë. Ai kërkon rishikimin e vendimit nga Apeli i Posaçëm.

Seanca për shqyrtimin e këtij ankimimi është caktuar të mbahet më 30 qershor, ku pritet të hidhet më shumë dritë mbi pronësinë e vilës dhe pretendimet e ngritura nga organet e drejtësisë.

Ndërkohë, Belinda Balluku, ish-ministre e Infrastrukturës dhe Energjisë, vijon të jetë nën hetim për një sërë çështjesh që lidhen me abuzime në tenderat publikë, korrupsion dhe pastrim parash.