Sherri në burgun e Fierit, zbardhet dëshmia e Denis Bajrit

Një ngjarje e rëndë është regjistruar brenda ambienteve të burgut të Fierit, ku i dënuari Denis Bajri, i njohur edhe me emrin Brajovic, pretendon se ka qenë objekt i një atentati të organizuar nga rivali i tij, i shumëkërkuari Ibrahim Lici.

Gjatë dëshmisë së dhënë para hetuesve, Bajri ka deklaruar se sulmi ndaj tij është kryer nga Jurgen Zotaj, i cili, sipas tij, ka vepruar me porosi të Licit. Sipas rrëfimit, fillimisht Aldo Gjini ka kërkuar një takim me të, duke u paraqitur në qeli së bashku me Zotajn. Ky i fundit i ka dhënë një telefon, përmes të cilit Bajri pretendon se ka komunikuar drejtpërdrejt me Licin.

“Jeta jote kaq e pati”, mësohet t’i jetë thënë në telefon, përpara se situata të përshkallëzohej. Menjëherë pas kësaj, sipas Bajrit, Zotaj ka tentuar ta godasë me një mjet prerës të improvizuar.

Nga përleshja e ndodhur brenda qelisë, të dy personat kanë mbetur të plagosur dhe janë transportuar për të marrë ndihmë mjekësore.

Pas incidentit, Komisioni i Disiplinës pranë Drejtorisë së Përgjithshme të Burgjeve ka marrë masa ndaj stafit përgjegjës, duke përjashtuar 8 efektivë policie dhe duke i referuar në prokurori për shpërdorim detyre. Paralelisht, Shërbimi për Çështjet e Brendshme dhe Ankesat ka nisur hetimet për të zbardhur rrethanat e plota të ngjarjes, përfshirë lejimin e lëvizjeve të të dënuarve dhe posedimin e një telefoni celular brenda qelisë, send i ndaluar rreptësisht.

Komisioni disiplinor ka vendosur gjithashtu izolimin për një periudhë tre mujore për Aldo Gjinin dhe Jurgen Zotajn. Ndërkohë, Gjini është transferuar në institucionin e vuajtjes së dënimit në Drenovë, ndërsa Zotaj në burgun e Burrelit.

Ngjarja ka ngritur shqetësime serioze mbi sigurinë dhe kontrollin në institucionet e vuajtjes së dënimit, duke rikthyer në vëmendje problematikat e brendshme të sistemit penitenciar në vend.