Shfajësohet Koçiu: Policia s’mund të rrijë në kuzhinë apo në piceri

Pak ditë më parë në Shqipëri ndodhën tre vrasje brenda pak orësh. Sipas ministres së Brendshme, Albana Koçiu, këto ngjarje janë krime të rënda, por nuk përbëjnë vrasje mafioze.

Gjatë raportimit në Komisionin për Çështjet e Brendshme dhe të Mbrojtjes, Koçiu theksoi:

“Në asnjë vend të botës polici nuk mund të rrijë në kuzhinë për të parandaluar djalin të vrasë babain, apo picierin të vrasë kuzhinerin.”

Ajo shtoi se, megjithëse ngjarjet janë tragjike, ato nuk implikojnë dështim të policisë së shtetit:

“Janë tre krime të rënda, por nuk janë vrasje mafioze, por janë të pashmangshme nga puna që bën policia. Unë nuk besoj se ka ndonjë vend të botës ku polici të rrijë në kuzhinë për të parandaluar që djali të godasë babain me thikën e bukës, apo në një vend të botës ku polici rri në kuzhinën e restorantit për të parandaluar picierin të godasë me thikë kuzhinierin. Janë ngjarje tragjike, por nuk implikohet puna e policisë së shtetit. Autorët janë kapur pas ngjarjeve,” tha Albana Koçiu.