Pa akses për ushqime dhe shkollë

Situatë alarmante në zonën e Shishtavecit, ku shembja e një ure ka izoluar plotësisht 20 familje të fshatit Shtrez, lagjja Gjuta. Banorët raportojnë se prej ditësh ndodhen të bllokuar, pa mundësi për të dalë nga zona dhe pa asnjë rrugë alternative kalimi.

Shembja e urës ka ndërprerë furnizimin me ushqime dhe produkte bazë, ndërsa fëmijët nuk mund të shkojnë në shkollë, duke e rënduar edhe më shumë gjendjen e komunitetit.

Banorët kërkojnë ndërhyrje të menjëhershme nga Bashkia Kukës dhe institucionet përgjegjëse për të rikthyer kalueshmërinë e zonës dhe për të garantuar furnizimin minimal për familjet e izoluara. Ata paralajmërojnë se nëse nuk ndërhyhet urgjentisht, situata mund të përkeqësohet me pasoja serioze për të moshuarit dhe fëmijët.

Banorët theksojnë se deri tani nuk ka pasur asnjë reagim apo ndërhyrje në terren.