Shisnin drogë pranë shkollave, Gjykata lë në burg 31 të dyshuarit

Gjykata e Tiranës ka caktuar masën e sigurisë “arrest në burg” për 31 persona, të dyshuar për përfshirje në grupe që merreshin me shpërndarjen e lëndëve narkotike në zona të ndryshme të kryeqytetit, përfshirë edhe hapësirat pranë institucioneve arsimore.

Vendimi i gjykatës vjen pas përfundimit të operacionit policor “Shkolla të Pastra”, i zhvilluar nga Sektori për Hetimin e Narkotikëve në Drejtorinë Vendore të Policisë Tiranë, në bashkëpunim me Prokurorinë e Tiranës.

Hetimi ka zgjatur rreth katër muaj, gjatë të cilëve autoritetet kanë identifikuar në total 52 persona që dyshohet se kanë qenë të përfshirë në veprimtarinë e shpërndarjes së drogës.

Nga 52 personat e evidentuar, ndaj 31 prej tyre janë ekzekutuar masat e sigurisë “arrest në burg”, ndërsa 14 persona të tjerë janë shpallur në kërkim, pasi nuk janë bërë ende të mundur kapja dhe ndalimi i tyre.

Sipas të dhënave të bëra publike nga Policia e Shtetit, gjatë fazës së hetimit janë arrestuar edhe 7 persona të tjerë, duke e çuar në 52 numrin e personave të identifikuar në kuadër të këtij hetimi.

Operacioni është përqendruar në goditjen e rrjeteve që dyshohet se shpërndanin lëndë narkotike në pika të ndryshme të Tiranës, me vëmendje të veçantë edhe ndaj zonave pranë shkollave.

Hetimet për rastin vijojnë, ndërsa personat e dyshuar do të përballen me procedurat e mëtejshme gjyqësore për veprat penale për të cilat akuzohen.