Shkodër, qëlloi 30-vjeçaren dhe u arratis

Plagosje me armë zjarri në Shkodër, 30-vjeçarja përfundon në spital – autori në arrati

SHKODËR – Një ngjarje e rëndë ka ndodhur sot në aksin rrugor Muriqan–Shkodër, ku një vajzë 30-vjeçare është plagosur me armë zjarri pas një konflikti me një 34-vjeçar.

E plagosura, e identifikuar si Erisa Isufi, është dërguar me urgjencë në spital dhe ndodhet jashtë rrezikut për jetën. Autori i dyshuar, Edison Probatistaj, është shpallur në kërkim, ndërsa policia po kryen kontrolle intensive për kapjen e tij.

Sipas njoftimit zyrtar të Policisë së Shkodrës, dyshohet se plagosja ka ndodhur për motive të dobëta. Grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes, ndërsa nuk përjashtohet asnjë pistë hetimi.

Ngjarja ka tronditur zonën, ku banorët shprehen të shqetësuar për përshkallëzimin e konflikteve që përfundojnë me armë në duar.