Sulmon ashpër Salianjin dhe Alimehmetin

Avokati i Sali Berishës, Genc Gjokutaj, ka reaguar me tone të ashpra kundër takimit të organizuar pak ditë më parë nga ish-deputeti Ervin Salianji, ku u mblodhën disa prej kandidatëve më të votuar në primaret e PD-së.

Në një status me gjuhë të fortë ironike, Gjokutaj nuk kurseu akuzat, duke i quajtur pjesëmarrësit “zhigolo”, ndërsa e krahasoi mbledhjen e tyre me një dukuri të çuditshme politike.

“Siç po dëgjojmë, këtë PD-në ‘plakë’ po e gjuajnë e zilepsin shumë dhe madje të gjithë jaranët kandidatë janë të rinj! Çfarë të ketë ndodhur vallë? Mos po lind ndonjë trend i ri politiko-erotik që ca zhigolo janë mbledhur në kafeteri dhe flasin për ‘plakën’ partnere?”, shkruan ai.

Gjokutaj vuri në dukje se të njëjtët persona që shpallin PD-në si “të mbaruar”, përpiqen njëkohësisht të ndërtojnë projekte politike mbi të.

“Sado moshatare të jetë PD-ja, prindërit i ka gjallë, dhe mirë do ishte të drejtoheshin në familje që kjo krushqi të ngjiste,” vijon ai.

Avokati shton se “hoxha që i ka yshtur” të rinjtë për këtë takim i ka thënë se “kafetë i kanë pirë mirë, por do të ishte më mirë t’i pinin turke, që të shikonin edhe filxhanin”. Sipas tij, “kjo krushqi vështirë të bëhet”.