Shqipëria riatdheson nga Siria pesë shtetas, gra dhe fëmijë

Ministria për Evropën dhe Punët e Jashtme ka njoftuar për përfundimin e operacionit të riatdhesimit vullnetar nga Siria të pesë shtetasve shqiptarë, gra dhe fëmijë.

Sipas Ministrisë së Jashtme, operacioni është rezultat i një procesi të gjatë koordinimi mes institucioneve shqiptare, përfaqësive diplomatike dhe konsullore, si dhe autoriteteve të vendeve të përfshira në këtë procedurë.

Kthimi i pesë shtetasve në Shqipëri është realizuar në kushte të sigurta, ndërsa autoritetet shqiptare kanë bërë të ditur se përgjegjësia institucionale nuk përfundon me mbërritjen e tyre në atdhe.

Pas riatdhesimit, shtetasve të kthyer do t’u ofrohet asistenca e nevojshme, ndërsa do t’i nënshtrohen edhe vlerësimeve shëndetësore dhe psikosociale. Institucionet përgjegjëse do të ndjekin më tej procesin e akomodimit, rehabilitimit dhe riintegrimit të tyre në shoqëri.

Ministria për Evropën dhe Punët e Jashtme ka vlerësuar bashkëpunimin ndërmjet institucioneve shqiptare dhe autoriteteve të huaja, me një falënderim të veçantë për autoritetet siriane, të cilat kontribuuan në përfundimin e procedurave dhe sigurimin e tranzitit të shtetasve shqiptarë.

Sipas institucionit, përfundimi i këtij operacioni tregon rëndësinë e bashkëpunimit ndërinstitucional në rastet që lidhen me kthimin e shtetasve shqiptarë nga zona të prekura nga konflikti.

Task-Forca ndërinstitucionale do të vijojë monitorimin e procesit të rehabilitimit dhe riintegrimit të pesë personave të riatdhesuar. Paralelisht, institucionet shqiptare do të vazhdojnë përpjekjet për kthimin e shtetasve të tjerë shqiptarë nga Siria, në rastet kur krijohen kushtet e nevojshme për një riatdhesim të sigurt.

Autoritetet shqiptare e konsiderojnë riatdhesimin pjesë të përgjegjësisë së shtetit për mbrojtjen e qytetarëve të tij, veçanërisht në situata të ndërlikuara dhe në zona të prekura nga konfliktet.