Çfarë zbulon dosja e SPAK?

Një hetim i thelluar i Prokurorisë së Posaçme zbulon një skemë të dyshuar korrupsioni dhe pastrimi parash në Agjencinë Kombëtare të Shoqërisë së Informacionit, ku fondet publike dyshohet se janë devijuar drejt pasurive luksoze.

Në qendër të hetimit janë ish-drejtoresha e AKSHI-t, Mirlinda Karçanaj, si dhe biznesmenët Ergys Agasi dhe Ermal Beqiri, të cilët sipas SPAK dyshohet se kanë ndërtuar një rrjet të strukturuar për përfitime të paligjshme përmes tenderëve publikë.

Rasti simbolik është ai i një apartamenti në Tiranë, i cili kaloi në disa duar me çmime të ulura artificialisht, përpara se të përfundonte në pronësi të familjarëve të Karçanajt. Sipas hetimit, vlera reale e pronës ishte rreth tre herë më e lartë dhe dyshohet se është paguar me para korrupsioni.

SPAK thotë se kjo nuk është një rast i izoluar. Hetimet kanë zbuluar një skemë të përsëritur, ku prona të ndryshme regjistroheshin në emra personash të tretë – shpesh punonjës të kompanive IT – për të fshehur përfituesit realë.

Një tjetër pasuri, një apartament dupleks në Qerret, rezulton të ketë kaluar në disa emra fiktivë, ndërsa sipas provave është përdorur nga Karçanaj. Pagesat për mirëmbajtjen e tij dyshohet se janë kryer nga persona të lidhur me të.

Po ashtu, është sekuestruar një apartament luksoz pranë stadiumit “Air Albania”, i blerë me çmim më të ulët se vlera reale dhe më pas i dhënë me qira në kushte që hetuesit i konsiderojnë fiktive.

Hetimi shtrihet edhe në pasuri të tjera, përfshirë toka, automjete luksoze dhe llogari bankare, të cilat sipas SPAK dyshohet se janë produkte të pastrimit të parave.

Në këtë skemë, një rol kyç sipas prokurorisë ka luajtur kompania “EA Solution”, e krijuar nga Ergys Agasi, e cila dyshohet se është përdorur për të kanalizuar ryshfete përmes faturave fiktive. Në llogaritë e saj janë identifikuar mbi 1 miliard lekë dhe qindra mijëra euro, pa justifikim real ekonomik.

Dëshmi të mbledhura nga hetuesit tregojnë se kompani që përfitonin tenderë publikë detyroheshin të paguanin përmes kontratave fiktive, ndërsa në disa raste ryshfeti dyshohet se është dhënë edhe në formë cash, përmes “kutive të verës” të mbushura me para.

Hetimi përshkruan gjithashtu presione ndaj operatorëve ekonomikë. Një administratore kompanie ka dëshmuar se u detyrua të firmoste kontrata fiktive pasi u përball me kërkesa për pagesa dhe kërcënime.

Ndërkohë, pasuritë e dyshuara të përfituara nga kjo skemë janë të shumta: vila në komplekse rezidenciale në Lundër dhe Palasë, apartamente në Tiranë dhe bregdet, toka dhe automjete luksoze.

Në dosje përmendet edhe një jaht luksoz me vlerë rreth 930 mijë euro, i cili sipas hetimit është transferuar në emër të një personi tjetër për të fshehur pronësinë reale.

SPAK ka sekuestruar pasuri me vlerë rreth 30 milionë euro dhe ka ngritur akuza për korrupsion dhe pastrim parash ndaj personave të përfshirë, ndërsa hetimet vijojnë për të zbardhur plotësisht rrjetin dhe përgjegjësitë.