S’ka qetësi për Aeroportin e Vlorës, gjermanët braktisin menaxhimin

Një zhvillim i papritur ka vënë në pikëpyetje ecurinë e Aeroportit të Vlorës, një nga investimet më të mëdha infrastrukturore në jug të vendit. Kompania gjermane Munich Airport International GmbH, e lidhur ngushtë me menaxhimin e Aeroportit të Mynihut, ka vendosur të mbyllë aktivitetin e saj në Shqipëri dhe të dalë përfundimisht nga projekti i operimit të këtij aeroporti.

Vendimi është marrë nga bordi drejtues i kompanisë, i cili ka dhënë miratimin për nisjen e procedurave të likuidimit dhe çregjistrimit të degës shqiptare. Në dokumentacionin zyrtar theksohet se ndërprerja e aktivitetit konsiderohet si zgjidhja më e përshtatshme për interesat strategjike të kompanisë, ndërsa procesi do të realizohet në përputhje me kuadrin ligjor në fuqi në Shqipëri.

Munich Airport International kishte hyrë në tregun shqiptar në mars të vitit 2025, me synimin e vetëm për të marrë përsipër operimin e Aeroportit të Vlorës. Sipas marrëveshjes koncesionare, kompania që po ndërton aeroportin, Vlora International Airport (VIA), është e detyruar të angazhojë një operator me eksperiencë ndërkombëtare për menaxhimin afatgjatë, duke qenë se aksionerët e saj nuk kanë përvojë direkte në administrimin e aeroporteve.

Për këtë arsye, VIA kishte paraqitur një marrëveshje bashkëpunimi me palën gjermane, ndërsa më herët ishte bërë publike edhe deklarata se operimi i aeroportit do t’i besohej pikërisht këtij grupi me përvojë në sektorin e aviacionit.

Megjithatë, zhvillimet e fundit sugjerojnë se dinamika brenda projektit ka ndryshuar ndjeshëm. Raportime të ndryshme flasin për përplasje mes aksionerëve kryesorë, çka mund të ketë ndikuar në vendimin e kompanisë gjermane për tërheqje. Ky faktor duket se ka krijuar një klimë pasigurie që ka çuar në rishikimin e angazhimit të saj në Shqipëri.

Dalja e Munich Airport International nga projekti shton paqartësitë mbi të ardhmen e Aeroportit të Vlorës. Përveç vonesave të deritanishme në ndërtim dhe mungesës së një afati të qartë për përfundimin, tashmë mbetet e hapur çështja se cili operator do të marrë përsipër menaxhimin e aeroportit në të ardhmen.