Skandal në Astir, mbetjet e kafshëve hidhen në trotuar

Pamje shqetësuese janë regjistruar në zonën e Astirit në Tiranë, ku në një hapësirë publike janë hedhur mbetje kafshësh, përfshirë lëkura dhe kocka, duke krijuar një situatë alarmante për higjienën dhe shëndetin publik.

Në videon e siguruar nga qytetarët, mbetjet organike shihen të shpërndara pranë trotuareve dhe zonave të frekuentuara nga banorë e automjete, ndërsa era e rëndë dhe pamjet e degraduara kanë shkaktuar reagime të forta në rrjet.

Ky episod vjen në një moment delikat për Shqipërinë, vetëm pak ditë pasi u miratua IBAR-i, dokument kyç në procesin e integrimit europian. Megjithatë, situata të tilla ngrenë pikëpyetje serioze mbi aftësinë e institucioneve për të garantuar standardet minimale të menaxhimit të mbetjeve dhe mbrojtjes së mjedisit.

Kapitulli 27 i negociatave me Bashkimin Europian, që lidhet me mjedisin dhe ndryshimet klimatike, konsiderohet një nga më të vështirët për t’u përmbushur. Pamjet nga Astiri tregojnë një realitet krejt ndryshe nga ai që prezantohet në raportet zyrtare dhe deklaratat politike.

Ekspertët paralajmërojnë se mbetjet organike të hedhura në ambiente publike përbëjnë rrezik të drejtpërdrejtë për shëndetin e qytetarëve, sidomos në zona të banuara dendur. Në raste të tilla, Autoriteti Kombëtar i Ushqimit dhe strukturat përgjegjëse të mjedisit kanë detyrimin të ndërhyjnë menjëherë për identifikimin e burimit të ndotjes dhe marrjen e masave.

Por sipas qytetarëve, institucionet reagojnë vetëm në mënyrë sporadike, ndërsa problematika të tilla vijojnë të përsëriten në zona të ndryshme të kryeqytetit.

Ngjarja ka rikthyer debatin mbi menaxhimin urban në Tiranë dhe kontrastin mes imazhit që promovohet jashtë vendit dhe realitetit që përballin qytetarët çdo ditë në terren.

https://streamable.com/jg4k8r?quality=highest