Tiranë, Prill 2025 – Publik.al
Ndërkohë që drejtues të lartë të Bashkisë së Tiranës përballen me drejtësinë për akuza korrupsioni, një tjetër skemë abuzive po trondit mijëra qytetarë: Ujësjellës Kanalizime Tiranë (UKT) po zhvillon një fushatë të heshtur, por të egër grabitjeje ndaj abonentëve që nuk kanë asnjë detyrim ndaj këtij institucioni.
Në qendër të kësaj skeme abuzive qëndron një absurditet ligjor dhe etik: qytetarëve po u kërkohet të paguajnë borxhe të mbartura nga pronarë të mëparshëm të ambienteve që ata kanë blerë ose qiradhënë. Edhe pse kanë nënshkruar kontrata të reja me UKT, kanë paguar çdo faturë të fryrë me përpikëri dhe nuk rezultojnë me asnjë detyrim, sot përballen me ndërprerjen e furnizimit me ujë – një shërbim bazik dhe jetik.
Si funksionon skema?
UKT, në vend që të mbyllë kontratat e vjetra të pronarëve të mëparshëm pas shitjes së pronave, i ka mbajtur ato të hapura dhe tani, pas më shumë se një dekade, u kthen faturat e papaguara te qytetarët që kanë kontrata të reja dhe zero detyrime. Në një rast konkret, një qytetar i Tiranës ka marrë një shkresë nga UKT ku i kërkohet të shlyejë borxhet e kontratës së mëparshme të vitit 2006, ndonëse ai vetë ka një kontratë të re të firmosur në vitin 2008 dhe që nga ajo kohë ka paguar çdo faturë në kohë.
Njësoj si në rastet e kredive të këqija, por pa asnjë bazë ligjore që ta justifikojë, UKT po praktikon një model gjobitës kolektiv, ku klientët e rregullt penalizohen për neglizhencën dhe papërgjegjshmërinë e vetë institucionit.
2 mijë deri në 3 mijë familje të kërcënuara
Sipas burimeve të brendshme pranë UKT, kjo praktikë nuk është një incident i izoluar. Ajo ka prekur aktualisht mbi 2 mijë deri në 3 mijë abonentë në Tiranë, shumë prej të cilëve janë lënë pa ujë ose kërcënohen çdo ditë me ndërprerjen e shërbimit.
Shumë qytetarë të dëshpëruar kanë kontaktuar zyrat e UKT për të sqaruar situatën, por janë përballur me refuzim, arrogancë ose kërcënime për përmbarim nëse nuk paguajnë. Nuk ka asnjë rrugë të qartë ankimimi, dhe kontratat e reja – që duhet të ishin prova e vetme ligjore – po injorohen nga institucioni.
Ku është ligji? Ku janë institucionet?
Skandali nuk qëndron vetëm te faturat e fryra dhe borxhet e pamerituara, por te mungesa e transparencës dhe heshtja e institucioneve mbikëqyrëse. Ku është ERRU? Ku është Avokati i Popullit? Pse heshtin bashkia e komanduar dhe qeveria, në një kohë kur qytetarët po plaçkiten për borxhe që nuk i kanë shkaktuar vetë?
Ky nuk është më një problem teknik apo administrativ. Kjo është një shkelje flagrante e të drejtave të njeriut, një shantazh që ndodh në mes të kryeqytetit, në emër të ligjit, por me moralin e një organizate grabitëse.
Në një kohë kur Shqipëria aspiron integrimin evropian dhe ligjshmërinë, UKT po vendos një precedent të rrezikshëm: që përgjegjësia ligjore nuk i përket më individit, por mund të shpërndahet arbitrarisht sipas interesit financiar të institucionit.
Publik.al fton të gjithë qytetarët e prekur nga kjo praktikë të ndajnë dokumentet dhe historitë e tyre me redaksinë tonë. Kjo nuk është më vetëm një çështje fature. Kjo është një çështje drejtësie.
