Skandal te burgu i Drenovës, Laert Haxhiu kapet sërish me celular

Një tjetër incident i rëndë është regjistruar në burgun e Drenovës, ku i dënuari me burgim të përjetshëm, Laert Haxhiu, është kapur sërish në posedim të një aparati celular brenda qelisë.

Burime nga institucioni i vuajtjes së dënimit bëjnë me dije se pajisja është zbuluar gjatë kontrolleve rutinë të ushtruara nga autoritetet, duke ngritur pikëpyetje serioze mbi sigurinë dhe funksionimin e sistemit penitenciar.

Rasti në fjalë nuk është i izoluar, pasi herë pas here janë evidentuar situata të ngjashme ku të dënuar për vepra të rënda penale kanë arritur të sigurojnë mjete komunikimi të ndaluara, duke sfiduar rregullat dhe kontrollin brenda institucioneve të burgimit.

Ngjarja pritet të pasohet me hetime të thelluara administrative dhe masa disiplinore për të identifikuar përgjegjësit dhe për të parandaluar përsëritjen e rasteve të tilla.

Laert Haxhiu është dënuar me burgim të përjetshëm për disa ngjarje të rënda kriminale, mes tyre vrasja e Zamir Latifit dhe Jurgen Çelës në Lushnjë, si dhe për akuza të tjera të lidhura me veprimtari kriminale.