Kryepolici hap garën për tre departamente kyçe, priten lëvizje të forta

Drejtori i Përgjithshëm i Policisë së Shtetit, Skënder Hita, ka nisur një proces të gjerë riorganizimi në strukturat drejtuese, duke hapur garën për tre nga departamentet më të rëndësishme: Policinë Kriminale, Marrëdhëniet Ndërkombëtare dhe Kufirin e Migracionin.

Ky hap vjen në kuadër të një strategjie për të forcuar eficiencën dhe për të sjellë energji të re në institucion, ndërsa ndryshimet pritet të shtrihen edhe në nivel qarqesh, aty ku ende nuk janë prekur drejtuesit aktualë.

Sipas burimeve, çdo efektiv policie me gradë drejtuesi ka të drejtë të aplikojë në këtë proces konkurrimi, duke hapur rrugën për një garë të gjerë brenda radhëve të Policisë së Shtetit.

Një nga lëvizjet më të rëndësishme pritet në krye të Policisë Kriminale, një strukturë kyçe që konsiderohet si numri dy në hierarkinë e institucionit. Pas përfundimit të mandatit të Neritan Nallbatit, i cili e drejton këtë departament që prej gushtit 2022, pritet një emërim i ri.

Ndër kandidatët më të përfolur për këtë pozicion është Ervin Hodaj, aktualisht drejtues i komanduar i Policisë së Durrësit, i cili shihet si një prej alternativave më të forta për të marrë drejtimin e Policisë Kriminale.

Në të njëjtën linjë, gara është hapur edhe për drejtimin e Departamentit të Marrëdhënieve Ndërkombëtare, i cili prej vitit 2020 drejtohet nga Pëllumb Seferi. Për këtë post, një nga emrat që pritet të hyjë në garë është Idajet Faskaj.

Ndryshime priten edhe në Departamentin e Kufirit dhe Migracionit, aktualisht nën drejtimin e Saimir Muçës, i emëruar një vit më parë gjatë mandatit të ish-drejtorit Ilir Proda.

Pas përfundimit të këtij procesi konkurrimi në nivel qendror, pritet që lëvizjet të shtrihen edhe në disa qarqe të vendit, përfshirë Beratin, Elbasanin, Korçën, Gjirokastrën dhe Durrësin, duke sinjalizuar një valë të re reformimi në Policinë e Shtetit.

Meta description: Skënder Hita hap garën për drejtuesit e Policisë Kriminale, Marrëdhënieve Ndërkombëtare dhe Kufirit, ndërsa priten ndryshime të mëdha në Policinë e Shtetit.