Çfarë ka ndodhur?

Një tender i Agjencisë Kombëtare të Shoqërisë së Informacionit (AKSHI) për “Shërbimin e internetit dhe intranetit për institucionin dhe institucionet publike” me fond limit 486 milionë lekë (rreth 5 milionë euro) është kthyer në betejë të hapur.

Në Komisionin e Prokurimit Publik (KPP) kanë mbërritur njëra pas tjetrës pesë ankesa nga kompani të ndryshme:

• MC NETWORKING
• ALBANIAN SATELLITE COMMUNICATIONS
• VODAFONE ALBANIA
• ONE ALBANIA
• ABISSNET

Është e rrallë që të gjithë operatorët kryesorë dhe disa më të vegjël të ankimojnë të njëjtin tender, duke ngritur dyshime serioze mbi kushtet dhe kriteret e vendosura nga AKSHI.

Pse po ankimohet tenderi?

Tenderi u hap më 22 gusht 2025 dhe pritet të mbyllet më 22 shtator 2025. Ai parashikon një kontratë me afat 730 ditë (2 vjet) dhe ka natyrën e një marrëveshjeje kuadër.

Dokumentet e tenderit përcaktojnë që shërbimi duhet të ofrohet në të gjitha institucionet shtetërore, në të gjithë territorin e Shqipërisë, me detyrimin për garanci teknike dhe mbështetje 24/7.

Por sipas ankimimeve, kriteret teknike janë formuluar në mënyrë që favorizojnë një subjekt të caktuar, duke e bërë praktikisht të pamundur pjesëmarrjen në kushte të barabarta të operatorëve të tjerë.

Skema e përsëritur e AKSHI-t

Ky nuk është rasti i parë që AKSHI përfshihet në tendera të kontestuar. Për vite me radhë, agjencia është kritikuar për tendera me kushtet teknike të paracaktuara, ku konkurrenca kthehet në formalitet dhe kontratat përfundojnë gjithmonë në duart e pak operatorëve “të preferuar”.

Në këtë rast, fakti që të pesë operatorët kryesorë të tregut kanë protestuar njëzëri, tregon se jemi përballë një procedure me shkelje flagrante.

Shërbimi i internetit për institucionet shtetërore është një infrastrukturë kritike. Nëse tenderi manipulohet që në nisje, atëherë rrezikohet jo vetëm konkurenca e ndershme, por edhe siguria e rrjeteve shtetërore.

Nga ana tjetër, shuma prej 5 milionë eurosh është shumë e lartë për një shërbim që në treg ofrohet me kosto më të ulët, duke ngritur dyshime mbi fryrjen e fondit limit dhe mbi mundësinë e ndarjes së parave publike përmes kontratave të mbyllura.

Ky tender është një tjetër dëshmi se AKSHI është shndërruar në një fabrikë tenderash të kontestuar. Kur të gjithë operatorët e tregut bashkohen për të ankimuar një procedurë, kjo do të thotë se “garancia e barazisë” ka vdekur.

Shteti shqiptar është në prag të shpalljes së një kontrate strategjike për internetin dhe intranetin e institucioneve publike, ndërkohë që procesi po zhvillohet në një klimë tërësisht të kontaminuar nga klientelizmi dhe dyshimet për manipulim.

Në një vend normal, një tender me kaq ankesa nga të gjithë operatorët do të ishte pezulluar menjëherë. Në Shqipëri, ka shumë gjasa që ai të vazhdojë deri në fund, me fituesin e përcaktuar paraprakisht.