Tensione dhe përplasje të forta mes studentëve dhe policisë

Protesta e studentëve dhe gjimnazistëve në Tiranë është zhvendosur përpara Parlamentit, pas përplasjeve të regjistruara më herët pranë Ministrisë së Arsimit. Edhe në këtë zonë, Policia ka përdorur gaz lotsjellës për të shpërndarë turmën.

Të rinjtë kanë vijuar marshimin drejt institucioneve shtetërore, por situata është tensionuar menjëherë pas mbërritjes së tyre përpara Kuvendit, ku efektivët kanë ndërhyrë me gaz lotsjellës.

Më herët, protesta pranë Ministrisë së Arsimit u shoqërua me përplasje mes demonstruesve dhe forcave të rendit. Pas ndërhyrjes së policisë, studentët dhe gjimnazistët u larguan nga zona dhe marshuan në drejtim të qendrës së kryeqytetit.

Zhvendosja e protestës përpara Parlamentit shënon një tjetër episod të tensionuar në mobilizimin e të rinjve, të cilët prej ditësh kanë dalë në rrugë me kërkesa kundër qeverisë dhe thirrje për dorëheqjen e kryeministrit Edi Rama.

Përdorimi i përsëritur i gazit lotsjellës dhe përplasjet në disa pika të kryeqytetit e kanë mbajtur situatën të tensionuar, ndërsa protesta vijon të zhvendoset pranë institucioneve kryesore shtetërore.