Tensione në Patos-Marinëz, banorët çajnë portën e “Bankers Petroleum”

Ka nisur me tensione protesta e paralajmëruar prej dy ditësh nga banorët e zonës naftëmbajtëse Patos-Marinëz, të cilët kanë dalë sërish në rrugë për të kërkuar zgjidhje për problemin e tokave të dhëna me qira për aktivitetin e kompanisë Bankers Petroleum.

Situata është përshkallëzuar që në nisje të protestës, pasi një grup banorësh kanë hapur me forcë portën e një prej sektorëve të kompanisë dhe janë futur brenda ambienteve të saj.

Banorët kanë kërkuar largimin e punonjësve nga zona, ndërsa tensionet janë shtuar gjatë përplasjes mes protestuesve dhe përfaqësuesve të kompanisë.

Kërkojnë pagesat për tokat e dhëna me qira

Në themel të protestës qëndrojnë kërkesat e banorëve për respektimin e marrëveshjeve të lidhura për tokat e tyre dhe marrjen e pagesave që, sipas tyre, u takojnë në bazë të kontratave.

Protestuesit pretendojnë se kompania nuk ka përmbushur detyrimet e saj financiare dhe kërkojnë që çështja të zgjidhet pa vonesa të mëtejshme.

Një prej banorëve e ka shprehur me tone të forta pakënaqësinë e tij gjatë protestës:

“Është prona ime, jo e jotja. Kemi bërë një kontratë bashkë, por nuk po e zbaton, nuk po më jep lekët.”

Kjo është një tjetër përplasje mes banorëve të zonës dhe kompanisë për çështjen e tokave. Edhe më herët, banorët kanë protestuar duke kërkuar pagesat e qirave dhe një zgjidhje për marrëveshjet e lidhura me pronat e tyre.

Ndërkohë, situata në Patos-Marinëz vijon të mbetet e tensionuar, ndërsa pritet të shihet nëse protesta do të shoqërohet me ndërhyrje të forcave të rendit apo me një përpjekje për dialog mes banorëve dhe kompanisë.