Shkaktoi aksidentin tragjik, duke lënë dy fëmijë të vdekur

Një ngjarje tragjike tronditi Durrësin dhe mbarë vendin, teksa një aksident i rëndë i mori jetën dy fëmijëve të mitur dhe la një tjetër të plagosur rëndë.

Gjykata ka vendosur masën e sigurisë “arrest me burg” për 57-vjeçarin Nikoll Radaçi, drejtuesin e mjetit që shkaktoi aksidentin fatal.

Ngjarja ndodhi mesditën e 3 majit në lagjen nr. 15, ku tre fëmijë po luanin me top në trotuar. Sipas të dhënave, drejtuesi i mjetit, në gjendje të dehur, ka humbur kontrollin dhe ka përplasur të miturit.

Si pasojë, dy prej fëmijëve, të moshës 12 dhe 10 vjeç, humbën jetën, ndërsa një tjetër 8-vjeçar arriti të mbijetojë, por ndodhet në gjendje të rëndë shëndetësore.

Autori kishte qenë i raportuar disa herë më parë nga banorët e zonës për shkelje të rregullave të qarkullimit rrugor, si dhe ishte ndëshkuar nga policia rrugore.

57-vjeçari doli sot para gjykatës, ku iu komunikua masa e sigurisë, ndërsa në pamjet e publikuara nga media ai shfaqet kokëulur në kafazin e xhamtë gjatë seancës.

Ngjarja ka shkaktuar reagime të forta në opinionin publik dhe debate politike.