Tritol te lokali i Noizyt në Durrës

Një sasi e vogël e dyshuar lënde eksplozive është gjetur në orët e para të mëngjesit të sotëm në ambientet e një lokali në pronësi të këngëtarit Rigels Rajku, i njohur me emrin artistik Noizy, në zonën e Plazhit në Durrës.

Sipas Policisë së Durrësit, lënda eksplozive është gjetur në pjesën e përparme të biznesit dhe rezulton e pashpërthyer. Ngjarja është konstatuar në lagjen nr. 13, ndërsa rrethanat dhe motivet mbeten ende të paqarta.

Pas njoftimit, në vendngjarje kanë shkuar shërbimet e Policisë dhe grupi hetimor, të cilët kanë nisur veprimet për dokumentimin e plotë të rastit.

Policia bën me dije se po punohet për identifikimin dhe kapjen e autorit ose autorëve të dyshuar, si dhe për zbardhjen e motiveve të vendosjes së lëndës eksplozive.

Sipas njoftimit zyrtar, në derën e dyqanit në pronësi të shtetasit R. R. është gjetur një sasi e vogël e dyshuar lëndë eksplozive e pashpërthyer.

Kjo nuk është hera e parë që bizneset e këngëtarit Rigels Rajku, i njohur si Noizy, bëhen objekt i ngjarjeve me lëndë eksplozive. Hetimet pritet të përcaktojnë nëse ngjarja e fundit lidhet me episode të mëparshme apo ka një motiv tjetër.