U dhunua dhe u arrestua nga policia, sot lihet i lirë Sahit Dollapi

Sekretari Organizativ i Partisë Demokratike, Sahit Dollapi, u arrestua në mënyrë të dhunshme nga Forcat e Ndërhyrjes së Shpejtë përpara godinës së Parlamentit gjatë protestës së opozitës.

Pasi u mbajt për rreth 2 orë në ambientet e Policisë, Sahit Dollapi u shoqërua me një autoambulancë në ambientet e Spitalit të Traumës.

Ndërkohë mëngjesin e sotëm, mësohet se Dollapi është lënë i lirë.

Dollapi ka deklaruar se është dhunuar barbarisht nga efektivët e Policisë së Shtetit dhe ka kërkuar ndihmë më të specializuar në ambientet spitalore. Autoambulancën, që shoqëroi Sahit Dollapin, mësohet se e shoqëruan edhe katër grupe të Forcave të Ndërhyrjes së Shpejtë.

Dollapi u zgjodh Sekretar Organizativ i PD-së në janar të këtij viti dhe ka udhëhequr të gjitha protestat e organizuara nga opozita, nga 16 shkurti dhe në vazhdim. Gjatë qeverisjes së PD-së, Dollapi ka mbajtur detyra të rëndësishme administrative, përfshirë ato të drejtorit të ÇEZ-it dhe UKT-së.