Ujë i pijshëm nga një fuçi e ndryshku, pamje shokuese nga Zerqani

Ndërsa në konferenca dhe dalje publike flitet për “Shqipërinë evropiane”, investimet strategjike dhe modernizimin e infrastrukturës, realiteti që përballin banorët në disa zona të vendit paraqitet krejt ndryshe.

Një pamje e publikuar nga Zerqani ka ngjallur reagime, pasi tregon atë që pretendohet se përdoret si pikë shpërndarjeje e ujit të pijshëm për banorët e zonës.

Sipas denoncimit, bëhet fjalë për një fuçi metalike të ndryshkur, të vendosur mes ferrave dhe shkurreve, nga e cila dalin dhjetëra tuba plastikë të zinj që shpërndajnë ujin drejt banesave.

Pamjet tregojnë se struktura është e improvizuar, pa rrethim mbrojtës dhe pa kushte të dukshme higjieno-sanitare, ndërsa mbetet plotësisht e ekspozuar ndaj ndotjes dhe faktorëve të jashtëm.

Denoncuesit e konsiderojnë këtë një kontrast të fortë mes premtimeve për investime në rrjetin e ujësjellësit dhe kushteve reale me të cilat përballen banorët e zonave rurale, duke ngritur pikëpyetje mbi standardet e furnizimit me ujë të pijshëm.