VIDEO/ Radhë kilometrike nga Korça drejt Tiranës

Radhë të gjata automjetesh janë krijuar në aksin Maliq–Gramsh, në kahun që lidh Korçën me Tiranën, duke shkaktuar vonesa të konsiderueshme për qindra drejtues mjetesh. Lëvizja në këtë segment po zhvillohet me ritme tepër të ngadalta, ndërsa në disa zona qarkullimi pothuajse është paralizuar.

Pamjet tregojnë vargje të gjata makinash të bllokuara, me drejtuesit që presin për minuta të tëra për të përshkuar vetëm disa metra rrugë.

Situata është përkeqësuar pasi ky aks po përdoret si alternativë lidhëse mes juglindjes së vendit, Elbasanit dhe më tej Tiranës. Devijimi i fluksit të automjeteve drejt këtij segmenti ka rritur ndjeshëm ngarkesën, në një kohë kur infrastruktura po përballet me probleme serioze.

Gjatë ditës janë konstatuar çarje dhe plasaritje të thella në disa pjesë të trupit të rrugës, duke e bërë qarkullimin jo vetëm të vështirë, por edhe potencialisht të rrezikshëm për drejtuesit e mjeteve. Autoritetet pritet të ndërhyjnë për të vlerësuar gjendjen dhe për të shmangur përshkallëzimin e mëtejshëm të situatës.