‘Virgjëresha e korrupsionit’ jep 2.5 mld lekë për pastrim ‘luksi’ te Trauma

Një procedurë prokurimi me vlerë të konsiderueshme është finalizuar pranë Spitalit Universitar të Traumës, duke ngritur dyshime mbi kapacitetet reale të operatorit që është shpallur fitues.

Bëhet fjalë për një kontratë 3-vjeçare për shërbimin e pastrimit, me një ofertë që arrin në rreth 2.5 miliardë lekë pa TVSH. Tenderi i është dhënë kompanisë “AIR” sh.p.k., e cila rezulton të ketë përdorur një subjekt mbështetës për të përmbushur kriteret e kërkuara.

Sipas dokumentacionit të procedurës, “AIR” sh.p.k., në pronësi të Alban Meçës dhe Joriana Xamos, është mbështetur nga kompania “SILVER” sh.p.k., në pronësi të Linard Balanit. Ky mekanizëm, i njohur në prokurimet publike si mbështetje në kapacitete, përdoret kur një kompani nuk i përmbush e vetme kriteret teknike apo ekonomike të tenderit.

Në praktikë, kjo nënkupton se subjekti mbështetës vë në dispozicion përvojën, pajisjet apo kapacitetet financiare, duke i mundësuar operatorit kryesor të marrë pjesë dhe të fitojë garën. Megjithatë, raste të tilla shpesh ngjallin dyshime mbi rolin real të kompanisë fituese në zbatimin e kontratës.

Një tjetër element që tërheq vëmendjen është diferenca shumë e vogël mes ofertës fituese dhe fondit limit, rreth 0.9%, çka ngre pikëpyetje mbi konkurrencën reale në këtë procedurë. Për më tepër, katër operatorët e tjerë pjesëmarrës janë skualifikuar dhe kanë paraqitur ankesa, të cilat nuk janë marrë në konsideratë, ndërsa fituesi është konfirmuar sërish.

Burime për mediat tregojnë se kompania “AIR” ka pasur në të kaluarën lidhje pronësie me emra të njohur në sektorin e shëndetësisë, fakt që shton interesin mbi këtë kontratë.

Kontrata parashikon që shërbimi i pastrimit në Spitalin e Traumës të kryhet deri në vitin 2029, duke e bërë institucionin të varur nga bashkëpunimi mes dy kompanive për një periudhë të gjatë.

Në këtë kontekst, mbeten ende të hapura pyetjet mbi kapacitetin real të operatorit fitues për të përmbushur një kontratë të kësaj përmase, si dhe mbi transparencën dhe konkurrencën në këtë procedurë prokurimi.