Në qendër bashkëshortja Lori Hoxha dhe aferat e inceneratorëve
Tiranë – Gazetari investigativ dhe botuesi i CNA.al dhe CNA TV, Elvi Fundo, ka marrë mesazhe kërcënuese nga një person që identifikohet si Vis Bajraktari, bashkëshorti i Lorela Hoxhës, pronare e mediave “Top Channel” dhe “DigitAlb”. Me një shqipe të çalë dhe në formë analfabetësh, personi i vetëquajtur Bajraktari ka shprehur pakënaqësi për publikimin e fotove dhe lajmeve në CNA, duke kërkuar që redaksia “të ketë kujdes” sepse çështjet po ktheheshin në personale.
Pas verifikimeve, CNA konfirmon se fotoja për të cilën u shpreh “kujdes” i përket Lorela Hoxhës, e cila prej kohësh është e martuar me Vis Bajraktarin. Sipas redaksisë, mesazhet e tij përbëjnë presion dhe shantazh për të ndaluar publikimin e të vërtetave që lidhen me aferën e inceneratorëve, ku Lorela Hoxha përmendet si ortake e Mirel Mërtirit dhe Klodian Zotos, pjesë e një grupi të strukturuar kriminal nën hetim nga SPAK.
CNA thekson se nuk ka asnjë interes personal me familjen e Bajraktarit, por me rolin publik të Lorela Hoxhës si pronare mediash dhe përfituese e fondeve publike përmes ortakërive dhe reklamave nga inceneratorët. “Nuk kemi punë me gruan e Vis Bajraktarit aspak, por kemi punë me ortaken e inceneratorëve dhe investitoren strategjike,” thuhet në reagimin e CNA.
Në mesazhe, Bajraktari i sugjeron gazetarit Fundo “merru me mua, s’ke punë me familjen”, gjë që CNA e interpreton si përpjekje për ta zhvendosur vëmendjen nga aferat financiare dhe marrëveshjet e dyshimta që përfshijnë bashkëshorten e tij.
LEXONI DISA NGA MESAZHET E VIS BAJRAKTARIT DREJTUAR GAZETARIT , ELVI FUNDO
Pse
Sipas CNA, Lorela Hoxha ka ndërhyrë edhe më parë, nëpërmjet personave të tretë, për të fshirë artikuj dhe për të ndaluar referencat publike mbi lidhjet e saj me inceneratorët. Ato i cilësojnë këto veprime si pjesë e një strategjie të përbashkët të “Top Channel” dhe njerëzve pranë saj për të heshtur zërat kritikë dhe për të shmangur hetimet.
CNA deklaron se do të vazhdojë publikimin e provave dhe të dhënave mbi aferën e inceneratorëve, dosjen “5D”, lidhjet me Erion Veliajn dhe rolin e mediave që kanë marrë miliona euro nga paratë e shqiptarëve. “As Vis Bajraktari, as kuç e maç nuk do të na ndalojnë për të thënë një të vërtetë me zë të lartë dhe me dokumente zyrtare,” përfundon reagimi i redaksisë.
Në fund, CNA i kujton Bajraktarit se përpara se të dërgojë kërcënime gazetarëve, duhet të pyesë bashkëshorten e tij për burimin e fondeve që kanë financuar bizneset dhe luksin e saj, të cilat, sipas akuzave, vijnë nga një aferë kriminale që i ka kushtuar shtetit shqiptar qindra milionë euro.
