Vota e diasporës dhe administratës, frika e vetme e Ramës për mandatin e katërt

Përditësuar më 27 Tetor 2024, 08:59

Në fjalimet e tij në diasporë, Edi Rama kërkon një mandat të katërt si kryeministër duke shitur propagandë të përsëritur mbi reformat dhe drejtësinë. Duke kërkuar votat e shqiptarëve të larguar nga vendi, Rama duket se po përpiqet të shfrytëzojë dy asete të rëndësishme në zgjedhjet e 2025-ës: administratën dhe diasporën, të vetmit që ende mund t’i ofrojnë një avantazh.

Në takim me shqiptarët në New York, Rama nuk la pa përmendur “arritjet” e qeverisë së tij, duke përmendur arrestimet e disa prej figurave politike të larta, përfshirë Berishën dhe Metën. Ai u mburr se ishte Reforma në Drejtësi, e promovuar nga Partia Socialiste, që i dha “goditjen vdekjeprurëse” kulturës së pandëshkueshmërisë. Por a është vërtet kështu?

Në thelb, Rama po përpiqet të kapitalizojë punën e SPAK-ut për kredo politike. Ndërsa SPAK përballet me një varg sfidash dhe dyshimesh mbi pavarësinë e tij, Rama e përdor atë si armën kryesore për të bindur diasporën se vetëm PS-ja mund të luftojë korrupsionin. Fjalimet e tij ngjasojnë me një përpjekje të fundit për t’i dhënë frymëmarrje një drejtësie që ndër vite ka vuajtur nga kapja politike.

Një tjetër aspekt që bie në sy është përpjekja e Ramës për të krijuar një imazh të lavdishëm për Shqipërinë, duke përshkruar vendin si të rilindur nën drejtimin e tij. Ai deklaron se “vjen erë shtet” dhe se gjithçka është transformuar nën udhëheqjen e tij. Por faktet tregojnë një realitet krejt ndryshe: Shqipëria është në krizë emigrimi, ku të rinjtë, të zhgënjyer nga mungesa e perspektivës dhe punësimit, vazhdojnë të largohen masivisht. Varfëria dhe papunësia janë ende plagë të përditshme për shumë shqiptarë, dhe progresi ekonomik që ai pretendon mbetet shpesh i paprekshëm për qytetarët e thjeshtë.

Edi Rama është i vetëdijshëm se drejtësia dhe diaspora janë kartat që do të përpiqet të luajë për zgjedhjet e ardhshme. Megjithatë, përdorimi i SPAK-ut si një vegël politike për t’i dhënë vetes kredibilitet është një përpjekje e rrezikshme, e cila vetëm sa thellon dyshimet mbi drejtësinë e vërtetë në vend. Ndërsa në Shqipëri SPAK po përballet me skandale të njëpasnjëshme dhe mungesë besimi, përpjekja e Ramës për të shpërndarë këtë propagandë në diasporë është një dëshmi e dëshpërimit të tij për të ruajtur pushtetin.

Diaspora dhe administrata mbeten asete të rëndësishme për të, por shqiptarët janë gjithnjë e më të ndërgjegjshëm për të vërtetën që fshihet pas premtimeve të tij. Nëse Rama mendon se do të mund të mashtrojë më tej qytetarët me propagandë, realiteti i hidhur i politikës shqiptare do t’i kthehet në bumerang.