Votimi i mbrëmshëm/ Meta- Ramës: U mbars mali dhe polli një mi

Parlamenti votoi mesnatën e së enjtes disa ndryshime në ligjin për “Të drejtën e informimit për dokumentet e ish-Sigurimit të Shtetit”, të cilat parashikojnë ndër të tjera hapjen e dosjeve, deklasifikimin e të gjithë dokumenteve nga 29 nëntori 1944 deri në 2 korrik 1991, të cilat disponohen nga të gjitha arkivat e rrjetit arkivor të Republikës së Shqipërisë.

Këto ndryshime, ashtu siç e tha vetë kryeministri Edi Rama, kanë për synim kreun e PL, Ilir Meta.

Ky i fundit, në një konferencë për shtyp sot, tha se këto ndryshime nuk janë asgjë.

“Ilir Meta i ka mbajtur të gjithë premtimet e tij.

Unë e kam mbajtur premtimin dhe deri më 24 korrik aty ka qenë një kështjellë e paprekshme e Kushtetutës. I kam fituar të gjitha betejat, brenda dhe jashtë. Janë investuar edhe qindra milionë euro për të blerë edhe institucione jashtë kundër Ilir Metës.

Për çështjen e ligjit që ata kanë bërë mbrëmë, ajo ishte sikur u mbars mali dhe polli një mi.

Mali u mbars më 25 korrik, në mes të vapës. Polli një mi mbrëmë në mesnatë se unë kam qenë në një festë familjare.

Nëse nuk i dalin ato breshkat, uroj që ky mi ta ndihmojë për të përmirësuar frymëmarrjen,” tha Meta.