Vrasja e Rexhep Ismailit, publikohet fotoja e Viktor Ruçit

Është publikuar fotojae 50-vjeçarit Viktor Ruçi, i njohur ndryshe si “Tori Ruçi”, një nga emrat që po del në qendër të hetimeve për konfliktin e dhunshëm të ndodhur një natë më parë në zonën e Gjashtës në Sarandë, ku humbi jetën 66-vjeçari Rexhep Ismaili.

Sipas të dhënave paraprake, ngjarja dyshohet të ketë nisur nga një përplasje e drejtpërdrejtë mes Kostandin Voglit dhe Viktor Ruçit. Burime nga grupi hetimor për mediat bëjnë me dije se Vogli, pasi e ka konstatuar Ruçin në ambientet e lokalit në pronësi të viktimës, ka thirrur persona të tjerë në mbështetje, çka ka sjellë përshkallëzimin e situatës.

Fillimisht konflikti është zhvilluar fizikisht, me përdorimin e sendeve të forta, por në vijim ka kaluar në përdorim armësh zjarri. Gjatë shkëmbimit të të shtënave, Kostandin Vogli ka mbetur i plagosur në këmbë. Në të njëjtën kohë, dyshohet se një prej të rinjve që shoqëronin Voglin ka qëlluar me armë në drejtim të Rexhep Ismailit, duke i shkaktuar vdekjen e menjëhershme.

Pas incidentit, Vogli është vetëdorëzuar në polici dhe është transportuar në spitalin e Sarandës, ku ka marrë ndihmën e parë. Mësohet se ai pritet të dërgohet në Vlorë për trajtim më të specializuar, si dhe për masa shtesë sigurie.

Ndërkohë, strukturat e policisë vijojnë hetimet intensive për të sqaruar plotësisht rrethanat e ngjarjes, si dhe për të identifikuar dhe lokalizuar të gjithë personat e përfshirë në këtë konflikt me pasoja fatale.