Vrau 48-vjeçarin për një vend parkimi, arrestohet autori

Policia e Kavajës ka arrestuar autorin e dyshuar për vrasjen e 48-vjeçarit Alket Isufi, ngjarje e ndodhur mesditën e 21 shkurtit në lagjen nr. 3 të qytetit.

Pas disa orësh kërkimesh intensive, shërbimet e Komisariatit të Policisë Kavajë, në bashkëpunim me Forcat e Posaçme “Shqiponjat” dhe Forcat Operacionale të DVP Durrës, bënë të mundur lokalizimin dhe vënien në pranga të 48-vjeçarit Landi Puja, banues në të njëjtën lagje.

Sipas njoftimit zyrtar, rreth orës 14:22, gjatë një konflikti për motive të dobëta, i dyshuari ka goditur disa herë me mjet prerës (thikë) shtetasin S. V., alias S. I., 48 vjeç, i identifikuar si Alket Isufi. Si pasojë e plagëve të marra, ai ka humbur jetën.

Menjëherë pas ngjarjes, autori u largua nga vendi i krimit, por u kap nga policia pas kontrolleve të shumta në zonë. Gjatë veprimeve të para hetimore, grupi hetimor ka gjetur dhe sekuestruar në cilësinë e provës materiale thikën me të cilën dyshohet se është kryer krimi.

Hetimet po vijojnë nën drejtimin e Prokurorisë pranë Gjykatës së Shkallës së Parë Durrës, për zbardhjen e plotë të rrethanave dhe dokumentimin ligjor të çështjes. Materialet procedurale i janë referuar Prokurorisë së Durrësit për veprime të mëtejshme.