31-vjeçari, anëtar i grupit të Marklen Hakës

Zbardhen identitetet e Imer Krrashit, 31-vjeçarit që u arrestua mesditën e së dielës në zonën e Liqenit të Thatë ndërsa tentoi t’i shpëtonte një kontrolli policor. BalkanWeb raporton se Krrashi është anëtar i grupit të Marklen Hakës, të njohur ndryshe si “I forti i Niklës”.

Sipas policisë, Imer Krrashi përdorte tre identitete, mes të cilëve Imer Masha dhe Imer Uka nga Kruja. Gjatë përpjekjes për t’i ikur kontrolleve, automjeti që ai drejtonte përplasi 9 automjete dhe një motomjet, ku ndodheshin një polic jashtë shërbimit dhe bashkëshortja e tij, të dy u dërguan në spital, jashtë rrezikut për jetën.

Me precedent të theksuar kriminal dhe me rrezikshmëri të lartë shoqërore, Krrashi u shoqërua në Komisariatin Nr. 1 për veprime të mëtejshme. Gjatë kontrollit të automjetit, forcat speciale “Shqiponja” gjetën dhe sekuestruan një pistoletë, armë zjarri që dyshohet të jetë përdorur në veprime kriminale të tjera.