1 vit pas fadromave, Rama kthehet në Theth: Paketa e Maleve nuk anulohet

Kryeministri zhvilloi një takim me aplikuesit e Paketës së Maleve, ndërsa protesta kundër nismës ka hyrë në ditën e 51-të. Ai mbrojti ligjin dhe kujtoi aksionin e shembjeve të ndërtimeve pa leje në verën e kaluar.

Një vit pasi Thethi u kthye në epiqendrën e aksionit të qeverisë për prishjen e ndërtimeve pa leje, kryeministri Edi Ramaështë rikthyer në fshatin turistik për të mbrojtur Paketën e Maleve, një nismë që prej më shumë se 50 ditësh po kundërshtohet nga protestuesit.

Në korrik të vitit 2025, pak javë pasi siguroi mandatin e katërt qeverisës, Rama nisi aksionin kombëtar për lirimin e territorit, duke zgjedhur Thethin si pikën e parë të ndërhyrjes. Aksioni u shoqërua me shembjen e dhjetëra bujtinave, hoteleve dhe objekteve pa leje, duke shkaktuar përplasje me banorët dhe reagime të forta publike në kulmin e sezonit turistik.

Pamjet e fadromave në një nga destinacionet më të frekuentuara turistike të vendit dominuan debatin publik për javë të tëra. Banorët e zonës akuzuan qeverinë se po dëmtonte ekonominë lokale në mes të sezonit, ndërsa ekzekutivi argumentoi se ndërhyrja ishte e domosdoshme për të ndalur ndërtimet pa leje dhe për të mbrojtur territorin.

Këtë herë, vizita e Ramës në Theth kishte një tjetër fokus. Kryeministri zhvilloi një bashkëbisedim me aplikues të Paketës së Maleve, të cilën qeveria e konsideron një instrument për zhvillimin ekonomik të zonave malore.

Vizita vjen në një kohë kur protesta kundër Paketës së Maleve ka hyrë në ditën e 51-të. Kundërshtarët e nismës kërkojnë shfuqizimin e saj, duke pretenduar se ajo krijon mundësi për tjetërsimin dhe shitjen e pronave në zonat malore. Qeveria i ka hedhur poshtë këto akuza.

Gjatë takimit, Rama deklaroi se qeveria nuk do të tërhiqet nga kjo nismë.

“Paketa e Maleve nuk është për uzurpatorë, as për biznesmenë që nuk kanë marrëveshje me ju, as për oligarkë. Është për të vënë në lëvizje ekonominë e trashëgimtarëve të pronave në territore ku toka nuk është ndarë sipas ligjit 7501 dhe për të krijuar mundësi zhvillimi aty ku turizmi është e vetmja alternativë”, u shpreh kryeministri.

Rama u ndal edhe te aksioni i verës së kaluar në Theth, duke thënë se vala e ndërtimeve pa leje nisi pas një keqkuptimi të mesazhit të tij për legalizimin e objekteve ekzistuese.

“Unë nuk kam ardhur këtu dhe kam thënë: vazhdoni dhe ndërtoni se i legalizojmë. Kam thënë se do të legalizojmë ndërtimet ekzistuese. Pas vizitës sime shpërtheu ndërtimtaria pa leje, me idenë se do të përfitonin edhe ata. U zaptua kartolina botërore e Thethit dhe kjo nuk mund të lejohej”, deklaroi Rama.