19-vjeçari që i thyen këmbën në protestë i nënshtrohet operacionit

19-vjeçari i plagosur gjatë protestës së një dite më parë në Tiranë po i nënshtrohet një ndërhyrjeje kirurgjikale, pasi ka pësuar frakturë në këmbë gjatë përplasjes me efektivët e Policisë.

Ngjarja ka rikthyer në vëmendje mënyrën se si u ndërhy nga forcat e rendit ndaj protestuesve dhe personave të pranishëm në zonën ku u zhvilluan tensionet. Pamjet e incidentit kanë nxitur reagime publike dhe kanë ngritur pikëpyetje mbi përdorimin e forcës policore.

Gjatë qëndrimit në Spitalin e Traumës, 19-vjeçari është vizituar nga ministrja e Shëndetësisë, Klodiana Spahiu. Në bisedën me ministren, i riu ka deklaruar se nuk kishte lidhje me protestën dhe se në momentin e ngjarjes ishte duke kaluar në rrugë.

Sipas raportimeve, dëmtimi i tij ka ardhur si pasojë e goditjeve nga punonjës të Policisë gjatë përplasjes. Rrethanat e plota të incidentit pritet të sqarohen nga hetimet përkatëse.

Pas ngjarjes, pesë punonjës policie janë pezulluar nga detyra. Masa ka përfshirë katër efektivë dhe shefin e Komisariatit të Policisë Nr. 1.

Për rastin kanë nisur hetimet Agjencia e Mbikëqyrjes Policore (AMP) dhe Prokuroria, të cilat pritet të verifikojnë rrethanat e ngjarjes dhe përgjegjësitë e mundshme të personave të përfshirë.