Burg kush bën thirrje për revoltë

Strukturat e Antiterrorit dhe të Hetimit të Krimit Kibernetik kanë ndërmarrë veprime hetimore ndaj personave të dyshuar për publikimin e kërcënimeve dhe thirrjeve për dhunë në rrjetet sociale, në kontekstin e protestave të zhvilluara që prej 13 tetorit në Tiranë dhe në disa qytete të vendit. Sipas njoftimit të Policisë së Shtetit, një person është ndaluar, 17 të tjerë janë proceduar penalisht, ndërsa materialet për tetë llogari online janë referuar në Prokurori për identifikimin e administratorëve.

Mes personave ndaj të cilëve janë ndërmarrë veprime procedurale është edhe ish-deputeti Eduard Ndocaj. Sipas Policisë, 51-vjeçari nga Shëngjini dyshohet për veprat penale “Thirrje publike për veprime të dhunshme” dhe “Thirrja për urrejtje nacionale”, pasi në rrjetet sociale ka publikuar video ku ofronte shuma parash për kryerjen e veprimeve të dhunshme ndaj deputetëve dhe anëtarëve të Këshillit të Ministrave.

Rasti i Ndocajt është përfshirë në një hetim më të gjerë që lidhet me përmbajtjet e publikuara në Facebook, Instagram dhe platforma të tjera online gjatë javëve të fundit. Autoritetet pretendojnë se disa prej këtyre publikimeve përmbajnë kërcënime, nxitje të dhunës ose të dhëna personale që mund të rrezikojnë sigurinë e personave të identifikuar.

Një person i ndaluar pas kërcënimeve për vendosjen e bombave

Sipas njoftimit zyrtar, në pranga është vënë një 33-vjeçar nga Tirana, me inicialet E. Xh., i dyshuar për përhapjen e informacioneve të rreme që ngjallin panik. Hetuesit dyshojnë se ai ka dërguar një mesazh kërcënues në llogarinë e Facebook-ut të një subjekti privat, duke paralajmëruar vendosjen e bombave në tri godina të kompanisë.

Një tjetër person, 34 vjeç, me inicialet A. K., është referuar në Prokurori për dyshime lidhur me thirrje publike për veprime të dhunshme në Instagram. Sipas Policisë, ndaj tij po verifikohen edhe rrethana që lidhen me hapjen e një llogarie në platformën GoFundMe, përmes së cilës dyshohet se ka kërkuar fonde duke pretenduar se i rrezikohej jeta. Gjatë kontrollit, atij iu gjet edhe një dokument identifikimi me të cilin prezantohej si gazetar, i cili u sekuestrua si provë materiale.

Në hetim edhe publikimi i të dhënave të punonjësve të Policisë

Në kuadër të të njëjtit aksion, është proceduar penalisht edhe Gentian Progni, 37 vjeç. Sipas autoriteteve, ai dyshohet se ka publikuar në mënyrë të përsëritur fotografi, video dhe të dhëna personale të punonjësve të Policisë së Shtetit, të shoqëruara me komente fyese dhe denigruese.

Policia pretendon se publikime të tilla mund të ekspozojnë efektivët dhe familjarët e tyre ndaj rreziqeve, si dhe të nxisin intimidim, kërcënime apo akte dhune. Në llogarinë që, sipas autoriteteve, administrohet nga 37-vjeçari, janë evidentuar gjithashtu postime me përmbajtje kërcënuese ndaj institucioneve shtetërore dhe thirrje për identifikimin e personave të tjerë.

Veprime procedurale janë ndërmarrë edhe ndaj personave të tjerë, të dyshuar për publikime me thirrje për dhunë gjatë protestave. Mes rasteve të përmendura nga Policia është edhe ai i një 20-vjeçari, i cili dyshohet se ka vendosur një banderolë me simbol nazist në fasadën e Universitetit Politeknik të Tiranës.

Tetë llogari të tjera nën verifikim

Përveç personave të identifikuar, materialet për shtatë llogari në platforma të ndryshme online dhe një llogari në Instagram janë referuar në Prokurori, me qëllim identifikimin e personave që i administrojnë. Sipas Policisë, në këto llogari janë publikuar mesazhe, shkrime ose komente që dyshohet se nxisin veprime të dhunshme apo përhapin informacione të rreme që mund të shkaktojnë panik.

Autoritetet bëjnë me dije se hetimet po vijojnë për identifikimin e personave të tjerë që mund të kenë lidhje me këto publikime. Materialet procedurale u janë referuar prokurorive kompetente për veprime të mëtejshme.

Veprimet e policisë vijnë në një periudhë tensionesh të shtuara politike dhe protestash, por njoftimi zyrtar i referohet konkretisht dyshimeve për kërcënime, nxitje të dhunës, përhapje informacioni që ngjall panik dhe publikim të të dhënave personale. Procedimi penal nuk përbën shpallje fajësie dhe përgjegjësia e secilit person do të përcaktohet nga organet e drejtësisë.