Shehaj nxjerr ligjin dhe i përgjigjet ministres: Ja si qeveria po mashtron qytetarët

Pasi ministrja e Ekonomisë, Anila Denaj hodhi poshtë zërat për rritjen e çmimit të karburantit, ish-deputeti i PD-së, Agron Shehaj ka reaguar, duke theksuar se “Qeveria po mashtron qytetarët”.

Në facebook, Shehaj ka publikuar ligjin për taksën e re, ndërsa shkruan se Rama po bën lojëra fjalësh dhe se po “mashtron njësoj si me taksën e Rrugës së Kombit”.   

Postimi i plotë:

Agron Shehaj nxjerr ligjin për taksen e re mbi karburantin. Edi Rama po mashtron, njësoj si për taksën e Rrugës së Kombit. Taksë apo tarifë, shqiptarët do ta paguajnë më shtrenjtë karburantin.

Qeveria mashtron qytetarët duke mohuar taksën e re mbi naftën.

Ligji i ri parashikon shprehimisht që burimi financiar i agjencisë mbi menaxhimin e rezervave të naftës do të jetë: “Tarifat e krijimit dhe mbajtjes se rezervës se sigurisë që aplikohen mbi sasitë e produkteve energjetike hidrokarbure që shiten në Republikën e Shqipërisë..”

dhe

“Këshilli i Ministrave, me propozimin e ministrit, vendos tarifat e përmendura në pikën 1.1..”

Rama bën lojra fjalësh. Edhe taksën prej 5 eurosh të Rrugës së Kombit e quajti tarifë por pak rëndësi ka si e quan.

E vërteta është që kemi të bëjmë me taksën e radhës për shërbime të panevojshme, që nuk ka për qëllim rritjen e cilësisë së jetës së qytetarëve por vetëm një mënyrë të re për të pasuruar veten dhe miqtë e tij oligarkë në kurriz të popullit me të varfër në Europë.