U pushua nga puna, ish-presidentja e Grammy padit Akademinë: Jam ngacmuar seksualisht

Deborah Dugan tha në padi se u pushua padrejtësisht pasi ngriti akuzat për ngacmim seksual dhe parregullsi në nominimet Grammy.

Padia e ngritur në Equal Employment Opportunity Commission (EEOC) vjen vetëm disa ditë para se të mbahet 62 vjetori i ndarjes së çmimeve Grammy dhe pak ditë pasi Dugan u pushua nga puna për sjellje të keqe.

Dugan pretendoi se u hoq nga posti vetëm 3 javë pasi i dërgoi një email drejtorit të menaxhimit të burimeve njerëzore  ku i renditi një numër akuzash bombë ndaj organizatës dhe drejtimit të saj të mbizotëruar historikisht nga burrat.

“Vendimi për pushimin e Dugan është shenjë hakmarrje ndaj ankesave të saj dhe u shoqërua me kërcënime në rast se ajo do vazhdonte me këmbëngulje ndaj pretendimeve kundër Akademisë,”– thuhet në padi.

Padia pretendon se Dugan ishte subjekt i ngacmimeve seksuale.

Gjithashtu përfshin pretendime për diskriminim të paligjshëm gjinor, hakmarrje të paligjshme dhe pagë të pabarabartë.