Gazetarët në studio: Policia e lidhur me krimin

Rritja e kriminalitetit dhe lidhja e personaliteteve politike me banda të strukturuara kriminale, ka bërë që debati për këtë çështje në media dhe jo vetëm, të ndizet e të marrë flakë.

Të ftuar në emisionin ‘Studio e hapur’ të gazetares Eni Vasili, gazetarja e kronikës, Klodiana Lala, ka hedhur akuza të forta në drejtim të policisë dhe politikës lokale.  Sipas Lalës, pjesa dërrmuese e zyrtarëve lokalë kanë bashkëvepruar me bandat, e kësisoj policia lokale nuk mund të bëjë asgjë në luftën kundrejt krimit të organizuar.

“Një burim i imi nga prokuroria në Shqipëri më njofton se klani i Habilajve në Vlorë ka lidhje të fortë me një pjesë të kupolës së Policisë së Shtetit.” – u shpreh Lala.

Por përballë Lalës, ndodhej edhe gazetari tjetër i njohur i kronikës, specialist në marrëdhëniet me prokurorinë, policinë dhe gjykatat, Artan Hoxha, i cili teksa pranoi akuzat e ngritura nga kolegia Lala, ka përsëritur një tjetër akuzë. Ai tha se ka urdhërarreste ndërkombëtare të cilat fshihen nga policia. Ai u bëri thirrje autoriteteve që të publikonin të kërkuarit nga drejtësia ndërkombëtare.