Bashës i skadon sot afati, LSI ‘e braktis’ dhe del e vetme në zgjedhje, zyrtarët e lartë të PD tentojnë të bindin Bamir Topin

Pak minuta më parë kur pritej që dy forcat kryesore të opozitës, PD dhe LSI, të firmosnin koalicionin për zgjedhjet e 25 prillit, është bërë me dije se forca politike e drejtuar nga Monika Kryemadhi do të garojë e vetme.

Ndërkohë, në Selinë e PD aktualisht ka zhvillime pasi aleatët e tjerë opozitarë pritet të firmosin marrëveshjen me Lulzim Bashën, shkruan newsbomb.al. I pari që do të firmosë do të jetë kreu i republikanëve Fatmir Mediu.

Më pas, do të firmosin koalicionin me Bashën, kreu i PAA Agron Duka, kreu i PDIU Shpëtim Idrizi, ai i demokristianëve Nard Ndoka dhe kreu i PBDNJ Vangjel Dule.

Kryetarët e partive që do të jenë në koalicion me Bashën do të firmosin një dokument me anë të së cilit do të autorizojnë kreun e PD për drejtimin e koalicionit, si dhe do të përcaktohet emri me të cilin opozita e bashkuar do të paraqitet në fletën e votimit.

Gjithashtu, zyrtarë të lartë të Partisë Demokratike po tentojnë të mbledhin të larguarit në listën e tyre për betejën e 25 prillit, shkruan newsbomb.al. Mësohet se të dërguarit e Bashës po zhvillojnë njën takim me kreun e FRD Bamir Topi, që ky i fundit të jetë në koalicionin opozitar.

Edhe kreu i Partisë Balli Kombëtar Demokrat Artur Roshi, kërkon që të jetë pjesë e listës së Lulzim Bashës për zgjedhjet e 25 prillit. Ky i fundit nuk pranoi dy vite më parë që të digjte mandatet siç bëri shumica opozitare, ndërsa sot kërkon te jetë sërish me PD.