Luftime nëpër rrugë dhe bombardime: Në qytetin lindor të Ukrainës, Rusia po godet civilët

Dy persona janë vrarë nga bombardimet në qytetin Popasna në lindje të Ukrainës, tha kreu i administratës ushtarake rajonale të Luhansk, Serhiy Hayday, i cili akuzoi forcat ruse për bombardimin e shtëpive private.

“Popasna vuajti më së shumti,” tha Hayday për qytetin, i cili ndodhet në rajonin lindor të Ukrainës, Luhansk.

“Përveç përleshjeve në rrugë, ushtria ruse po bombardon vazhdimisht ndërtesa të larta dhe shtëpi private”, tha ai.

“Dje, vendasit përballuan pesë sulme me artileri armike. Megjithatë, jo të gjithë mbijetuan. Në mbrëmje, një banor 66-vjeçar i Popasna-s vdiq, gruaja e tij u plagos. Gjithashtu, një person tjetër vdiq si pasojë e granatimeve.” shtoi Hayday.

Më vete, Hayday tha se rreth 30 njerëz ishin evakuuar nga qyteti afër Severodonetsk, përfshirë 15 pacientë të shtrirë në shtrat.

Vendbanimet në Luhansk janë vënë nën zjarr të fortë mes një mësymjeje të gjerë ushtarake ruse për të marrë dhe mbajtur më shumë territor në rajonin lindor të Donbasit.