Media britanike: Policë shqiptarë do të sillen në Britani për të ndalur hyrjen e emigrantëve nëpërmjet Kanalit

Skynews ka njoftuar sot se Policia shqiptare është treguar e gatshme të ndihmojë Britaninë e Madhe  për të ndaluar valën e emigrantëve të paligjshëm shqiptarë që hyjnë në këtëvend.

Media britanike  njofton se policë shqiptarë mund të sillet në Mbretërinë e Bashkuar për të vëzhguar ardhjet e emigrantëve dhe për të dhënë informacionet e mbledhura në përpjekje për të ndalur hyrjet e paligjshme të tyre nëpërmjet Kanalit.

Plani, pjesë e një marrëveshjeje të arritur midis Sekretares së Brendshme britanike Priti Patel dhe qeverisë shqiptare, mund të bëjë që oficerët nga vendi i Evropës Jugore të dërgohen në bregdetin e Kentit ku përpunohen të dhënat për emigrantët, njofton Skynews.

Home Ofice tha se Shqipëria ka premtuar mbështetje duke dërguar oficerë të lartë të zbatimit të ligjit në Mbretërinë e Bashkuar për të ndihmuar në reduktimin e shpejtë të atyre që hyjnë në Mbretërinë e Bashkuar me varka të vogla.

Oficerët shqiptarë do t’u ofrojnë autoriteteve gjithashtu informacion dhe mbështetje në përpunim, tha Home Office.

Zyrtarët qeveritarë besojnë se rreth 60% e emigrantëve që kalojnë në Kanal çdo ditë tani janë shqiptarë, megjithëse shifrat luhaten.

Zonja Patel dhe Bledi Cuci, ministri i Punëve të Brendshme të Shqipërisë janë zotuar në një diskutim që patën të martën mbrëma, të përshpejtojnë dëbimet e shqiptarëve që nuk kanë të drejtë të jenë në Mbretërinë e Bashkuar duke filluar që nga java e ardhshme.

Mësohet se kontrollet për emigrantët që mbërrijnë me varka, të cilët dyshohet se janë shqiptarë, do të kryhen me shpejtësi.

Reklama në shqip në Facebook dhe Instagram u publikuan të mërkurën në përpjekje për të penguar njerëzit që të mos i ndërmarrin këto udhëtime.