Rusia akuzon Ukrainën për përdorimin e armëve të “pista”!

Prej disa ditësh, Rusia ka akuzuar Ukrainën se po përgatitet të përdorë bombardime radioaktive ndaj ushtrisë së Moskës. Sipas Rusisë, Ukrainën po e ndihmojnë edhe shtetet Perëndimore, akuza të cilat i kanë kundërshtuar.

Perëndimi i ka konsideruar këto akuza si pretekst i Rusisë për të përshkallëzuar më tej luftën deri në përdorimin e armëve bërthamore.

Bomba radioaktive, ose siç njihet si “bomba e pistë”, përmban lëndë shpërthyese si të gjithë të tjerat, por në përbërje ka dhe lëndë radioaktive siç është Uraniumi. Shpesh herë konsiderohet si një armë që e përdorin terroristët dhe jo shtetet.

Kjo për shkak të përdorimit të saj. Bombat radioaktive janë më shumë për të përhapur panik më shumë se sa të shkaktojnë shkatërrim. Ukraina i ka mohuar këto akuza, madje ka njoftuar edhe ekspertë të OKB-së për të vizituar Kievin dhe të inspektojnë.

Çfarë pretendon Rusia?

Pa asnjë provë, Moska ka pretenduar se ka disa institucione shkencore në Ukrainë, të fshehura në godina civile, ku sipas tyre prodhojnë armatime të ndryshme duke përfshirë dhe bombat radioaktive. Ministri i Mbrojtjes i Rusisë, tha në një prononcim për mediat në 24 tetor se ka informacione të sakta që tregojnë se si Kievi po planifikon të sulmojë ushtarët rusë me bomba radioaktive.

“Arsyeja e një provokimi të tillë është për t’i vendosur fajin Rusisë për përdorimin e armëve të shkatërrimit në masë në Ukrainë. Ata po nisin një fushatë kundër Rusisë në të gjithë botën për të shkatërruar besimin e Moskës” – tha Igor Kirillov, kreu i Forcave të Mbrojtjes nga Lëndët Kimike dhe Radioaktive.

Si i është përgjigjur bota këtyre akuzave?

Akuzat e Rusisë janë hedhur poshtë nga Ukraina, Shtetet e Bashkuara, Mbretëria e Bashkuar, Bashkimi Evropian dhe NATO, të cilat nga ana e tyre kanë akuzuar Moskën se po përpiqet të përshkallëzojë luftën.

“Të gjithë e kuptojnë mirë, e kuptojnë se kush është burimi i gjithçkaje të pistë që mund të imagjinohet në këtë luftë”, tha Presidenti ukrainas Volodymyr Zelensky në fjalimin e tij më 23 tetor.

Shtëpia e Bardhë tha më 24 tetor se po “monitoron sa më mirë që mundemi” çdo përgatitje të mundshme për përdorimin e një bombe radioaktive në Ukrainë, por nuk sheh asgjë që të tregojë përdorimin e afërt të një arme të tillë.

Mbikëqyrësi bërthamor i OKB-së tha më 24 tetor se do të dërgojë inspektorë për të vizituar dy lokacione bërthamore në Ukrainë pasi të ketë marrë një kërkesë për ta bërë këtë nga autoritetet në Kiev.

Agjencia Ndërkombëtare e Energjisë Atomike (IAEA) tha se ishte “në dijeni të deklaratave të bëra nga Federata Ruse të dielën rreth aktiviteteve të supozuara në dy lokacione bërthamore në Ukrainë”, sipas një njoftimi për shtyp në faqen e internetit të agjencisë.

IAEA nuk dha vendndodhjen e dy vendeve. Në një postim në Tëitter më 24 tetor, Ministri i Jashtëm ukrainas Dmytro Kuleba tha: “Ndryshe nga Rusia, Ukraina ka qenë gjithmonë dhe mbetet transparente. Nuk kemi asgjë për të fshehur.”

A konsiderohet bomba radioaktive një armë bërthamore?

Jo. Shpërthimi nga një bombë radioaktive gjenerohet nga eksplozivët konvencionalë. Shpërthimi nga një armë bërthamore gjenerohet nga një reaksion bërthamor, siç janë bombat atomike që SHBA hodhi mbi Japoninë në Luftën e Dytë Botërore.

“Një bombë bërthamore krijon një shpërthim që është mijëra deri në miliona herë më i fuqishëm se çdo eksploziv konvencional që mund të përdoret në një bombë radioaktive”, sipas një fletë të dhënash nga Departamenti Amerikan i Sigurisë Kombëtare (DHS).

Shpërthimi nga një armë bërthamore mund të rrafshojë qytete të tëra. Për shembull, bomba atomike e hedhur në Nagasaki në vitin 1945 shkatërroi 2.6 milje katrorë (6.2 kilometra katrorë) të qytetit, sipas ICAN, Fushata Ndërkombëtare për Shfuqizimin e Armëve Bërthamore. Eksplozivët konvencionalë në një bombë të pistë mund të rrafshojnë ose dëmtojnë vetëm disa ndërtesa.