Detaje të reja nga vdekja e tij

Pak ditë më parë në Fushë-Krujë, u gjet i vdekur në një kanal 34-vjeçari Indrit Ndoj. Në lidhje me vdekjen e tij janë arrestuar dhe lënë në burg dy vëllezërit Landi dhe Sajmir Miri pasi në vendin e ngjarjes janë gjetur prova që i implikojnë ata në vdekjen e të riut.

Babai i Ndojt ka treguar se djali i tij ka dalë nga shtëpia më datë 20 rreth orës 18:00 dhe nuk është kthyer më. Dy shtetas me iniciale G.A dhe A.M kanë treguar në polici se atë natë janë takuar me Indritin rreth orës 21:00 dhe kanë pirë kafe deri në orën 22:30. Pas kësaj të tre janë larguar dhe kanë shkuar në një lokal tjetër në fshatin Luz, Fushë-Krujë.

Ata të tre kanë qëndruar në kafe deri në orën 00:45 datës 21.10.2022 dhe Ndoj së bashku me shtetasin A.M kanë konsumuar nga një dozë kokainë. Më pas ata të tre kanë hipur në makinë dhe kanë shkuar në dyqanin e G.A ku Ndoji ka marrë biçikletën për t’u larguar ndërsa dy personat e tjerë janë larguar me makinë. Sipas tyre, Indriti në një moment është rrëzuar nga biçikleta dhe më pas është nisur për në shtëpi.

Kur policia ka kryer kontrolle në shtëpinë e vëllezërve Miri, ka gjetur në shtëpinë e Landit një palë tuta, të cilat ishin me njolla si të kuqe dhe një pale çorape po me njolla të kuqe. Ndërkohë në shtëpinë e Sajmir Mirit është gjetur një shapkë e cila ishte e njëjtë me atë që u sekuestruar në vendin e ngjarjes ku u gjet i pajetë Indrit Ndoj.

Dy vëllezërit nuk kanë dhënë asnjë shpjegim në lidhje me këto prova. Ata janë lënë në burg me afat 60 ditor deri në përfundim të hetimeve.