Arrestimi i ish-zyrtarit të FBI-së/ Rama: Në akt-padi, s’ka asgjë që lidhet me mua

Kryeministri Edi Rama ka folur në lidhje me akuzat e ndritursa ndaj tij për lidhje me ish-zyrtarin e arrestuar të FBI-së, Charles McGonigal.

Në një deklaratë nga selia rozë, Rama tha se akuzat e ngritura  ndaj ish-zyrtarit të FBI-së nuk kanë lidhje me të.

Sipas tij, në akt-padinë e drejtësisë amerikane për McGonigal nuk ka asgjë që lidhet me të dhe qeverinë

“Kjo nuk ka lidhje me mua. Ne jetojmë në një zonë të botës ku njerëzit merren me kë takove, kujt iu fole, kujt nuk i fole, por jo çfarë i the dhe nuk i the.

E gjithë kjo ëhstë absurde dhe nuk ju vë faj juve se jeni pjesë e ndërmarrjeve…

Në akt-padinë e drejtësisë amerikane nuk ka absolutisht asgjë që lidhet me mua dhe qeverinë, përvec fakteve që janë takuar këtu, janë takuar atje”, theksoi kreu i qeverisë.

I pyetur në lidhje me lejimin e krijimit të një komisioni parlamentar me anë të të cilit mund të hetohet lidhja e kryeministrit Rama dhe qeverisë me këtë çështje, Rama tha se për çështjen ka folur drejtësia amerikane dhe se kjo nuk mund të kontestohet nga ato që i quajti “Foltorja” dhe “vula”.

Pjesë nga biseda me gazetarët:

Rama: Më mirë të shpenzojmë më shumë kohë nga ajo që i kam dhënë gurëve që hidhen në lumë për të bërë më shumë punë e për të zgjidhur më shumë hallet e njerëzve. Është një klimë Big Brotheri mediatik e politik, të gjithë i gjëmojnë like e share pa i vënë rëndësi nëse janë të vërteta.

Keni deklaruar se e keni mik.

Rama: Fjala mik është shumë e madhe. Unë kam folur për natyrën e marrëdhënies në gjuhën angleze, “Friendly relationship”. E kam takuar në zyrën me të rëndësishme të FBI në New York ku më ka dhënë medalje e kapele që në Big Brotherin politik u përfolën si përgjues, por nuk kemi shkëmbyer opinioni mbi fushat ku ishte ekspert.

A ishte në dijeni Ambasada Amerikane për takimet tuaja?

Rama: Unë nuk lajmëroj ambasadën amerikane kur takoj amerikanë

Kam takuar një zyrtarët më të lartë të FBI dhe do e takoja sa herë të më jepej mundësia një zyrtar me atë post. Kam takuar dhe presidentin e SHBA dhe fakti që është nën hetim apo jo nuk ka lidhje me mua. kam bërë shumë mirë që e kam takuar. Gjithë kjo është një absurd. Në akt padi nuk ka asgjë që lidhet me mua apo qeverinë përveç takimeve.

Takimet thuhet se janë shoqëruar me pagesa.

Rama: Në çfarë gjuhe e keni lexuar këtë?

Do të lejoni një komision parlamentar për hetimin e çështjeje?

Kjo çështje është hetuar nga drejtësia amerikane dhe kanë dalë konkluzione. Nëse mendoni se kjo mund të kontestohet nga vetëgjyqësia e Foltores apo vulës, nuk kam asnjë koment. Njerëzit zgjedhin të besojnë psh që edhe një oligark i madh rus ka ardhur në Karavasta për të përfituar nga shegët e luleshtrydhet.