Aksidenti afër TEG me tri viktima, grupi hetimor: Mjeti ecte me mbi 200 km në orë

Ka qenë pikërisht ky aksi ku ditën e djeshme 20-vjeçari Klevis Ruçaj ka udhëtuar me automjetin e tij Audi ku shkaktoi aksidentin tragjik me 3 të vdekur dhe 3 të plagosur. Burime nga grupi hetimor bënë me dije se automjeti ka qenë duke udhëtuar me të paktën 200 km në orë.

Në video shihet moment kur automjeti Audi i drejtuar nga 20-vjeçari Ruçaj ka goditur barrierat mbrojtëse të rrethrrotullimit, duke përfunduar në korsinë tjetër të rrugës e në nënkalim.

Nga pamjet vërehet se nuk ka tentativë për frenimin e mjetit, ndërsa kjo është vërtetuar edhe në rrugë, pasi nuk ka shenja të gomave në asafalt.

Kur fluturoi disa metra, mjeti fillimisht u përplas me murin dhe më pas ra mbi automjetin Hundai.

Nga aksidenti fatal humbi jetën Erisilda Abedini, 22 vjeçe dhe Sikela Përroi, 23-vjeçe, ndërsa drejtuesi i mjetit Klevis Ruçaj vdiq disa orë më vonë në spital.

Qemal Kurti, 60 vjeç, që  drejtonte mjetin Hundai dhe po udhëtonte nga Tirana drejt Elbasanit së bashku me 2 persona të tjerë, Alda Kurti dhe O. Kurti ndodhen në Spitalin e Traumës në gjendje të stabilizuar.

20-vjeçari Ruçaj me banim në Fier nuk ishte një emër i panjohur për efektivët e Policisë Rrugore.

Burime nga grupi hetimor thanë për SYRI TV se i riu ishte pajisur me leje drejtimi që prej vitit 2021 dhe njihej si person problematik, duke shkelur rregullat e qarkullimit rrugor.

Të paktën brenda një viti ishte ndëshkuar mbi 5 herë nga efektivët e qarkullimit rrugor.

I GJOBITUR .

Në datën 6.9.2022 për parakalim të gabuar.

Në datën 7.9.2022, për shkelje të sinjalizimit rrugor.

Në datën 15.11.2022, për mosrregullim shpejtësie në qendrat e banuara (garë shpejtësie).

Në datën 9.12.2022, për përdorim celulari.

Në datën 27.1.2023, për shkelje të sinjalizimit rrugor dhe i papajisur me siguracionin e detyrueshëm të mjetit motorrik.

 I apasionuar pas mejteve luksoze, motorrëve dhe shpejtësisë, i riu nuk ngurronte as të reklamonte në rrjetet sociale momente kur udhëtonte edhe me mbi 270 km në orë.

Ndërsa hetimet vijojnë, grupi hetimor ka rindërtuar dinamikën e ngjarjes. Duke llogaritur edhe forcën shtytëse të automjetit ka dyshime të forta se mjeti ka qenë duke udhëtuar me mbi 200 km në orë.